माडग्याळ : जत तालुक्‍यातील संख येथील युवतीवर बलात्कार करून खून करणारा नराधमास उमदी पोलिसांनी पुणे येथील भोसरी एमआयडीसीमध्ये मुसक्‍या आवळल्या.

श्रीशैल्य शिवगोंडा ढासाळ (वय 20) या नराधमाचे नाव असून  पोलिस निरीक्षक भगवान शिंदे यांच्या पथकाने त्याला अटक केली.  जत तालुक्‍यातील संख येथे एका 19 वर्षीय युवतीवर बलात्कार करून गळा दाबून खून केल्याचा प्रकार सोमवारी रात्री आठच्या सुमारास उघडकीस आला. संखपासून दीड किलोमीटरवरील वस्तीमध्ये हा प्रकार घडला होता. याप्रकरणी तिघा संशयितांना उमदी पोलिसांनी ताब्यात घेतले आहे. या घटनेमुळे जिल्हा हादरला होता. पोलिसांनी तीन संशयितांना ताब्यात घेऊन चौकशी सुरू केली आहे.

शुक्रवारपासून गावातील एक तरुण फरारी आहे. त्याचा शोध पोलिस घेत आहेत. याचा शोध घेण्यासाठी उमदी पोलिसांनी तिन पथके तयार केली होती. या खूनामध्ये आणखी कोणाचा सहभाग आहे का ? या दिशेने पोलिसांनी चक्रे फिरवली आहेत.तपास सहाय्यक पोलिस निरीक्षक भगवान शिंदे करीत होते. फरारी तरूणाचा शोध घेत पोलिसांनी सोलापूरपर्यंत या तरूणाचा मार्ग काढला.

सोलापूरमध्ये चौकशी केली असता हा तरूण पुणे येथे असल्याचे कळाले. पोलिस निरीक्षक भगवान शिंदे यांच्या नेतृत्वाखाली पथक तयार केले. फरारी तरूण भोसरी येथे एमआयडीसीमध्ये कामास जाण्याच्या तयारीत होता. त्याचवेळी त्या ताब्यात घेतले.