पिंपरी : शहरातील गरजू आणि गोरगरीब लोकांना पुरेसे अन्न पुरविण्याच्या दृष्टीने महापालिकेच्या पुढाकाराने आणखी ११ ठिकाणी कम्युनिटी किचन सुरू केले जाणार आहेत. त्याचा सुमारे साडेदहा हजार लोकांना लाभ मिळण्याची अपेक्षा आहे. 

ताज्या बातम्यांसाठी डाऊनलोड करा ई-सकाळचे ऍप

सर्वत्र टाळेबंदी लागू झाल्यावर शहरात अनेक नागरिक विशेषतः परप्रांतीय मजूर, कामगार, विद्यार्थी हे ठिकठिकाणी अडकून पडले आहेत. याशिवाय रोजंदारीवर काम करणाऱ्या लोकांचीदेखील उपासमार होण्याची शक्यता होती. त्यामुळे महापालिकेने स्वयंसेवी संस्थांच्या मदतीने १९ ठिकाणी कम्युनिटी किचन सुरू केली आहेत. आता त्याची व्याप्ती आणखी वाढविली जाणार आहे. 

पुण्याच्या बातम्या वाचण्यासाठी येथे ► क्लिक करा 

पालिकेचे सहाय्यक आयुक्त संदीप खोत म्हणाले, "ज्या ठिकाणी महिला बचत गट किंवा पुरेसे मनुष्य बळ, स्वयंपाकाची भांड्यांसह इतर सुविधा उपलब्ध आहेत. त्या ठिकाणी आम्ही कम्युनिटी किचन सुरू करण्यास प्राधान्य देत आहोत. जिल्हा अन्नधान्य वितरण कार्यालयाकडून कम्युनिटी किचन साठी ६८ टन आणि १२ टन अशा दोन टप्प्यांत गहू, तांदूळ पालिकेला प्राप्त झाले आहेत.

आणखी १२ टन तांदूळ मिळण्याची अपेक्षा आहे. सध्या चालू असलेल्या कम्युनिटी किचन मधून रोज ३४ ते ३५ हजार लोकांना जेवण दिले जात आहे. काही कम्युनिटी किचन मधून खिचडी बरोबरच भाजी-चपात्याही दिल्या जात आहेत."