पिंपरी - घरात अठराविश्व दारिद्र्य. वडील दारोदारी फिरून भविष्य सांगण्याचे परंपरागत काम करतात. आई घरोघरी जाऊन गोधड्या शिवते. यावरच कुटुंबाचा उदरनिर्वाह चालतो. दोन्ही भाऊ अपघातात गेले. तरीही, हार न मानता बावीस वर्षीय तरूणाने छत्रपती शिवरायांचा पराक्रम (Chhatrapati Shivaji Maharaj Prowess) डोळयामसमोर ठेवून स्वरचित गाणं (Song) केलं. ते प्रदर्शित (Release) व्हावं अशी त्याची इच्छा होती. त्यासाठी त्याने कुटुंबाला आर्थिक आधार असणाऱ्या बकऱ्या विकल्या आणि कर्ज काढून शिवजयंतीनिमित्त गीत सोशल मीडियावर (Social Media) प्रदर्शित केले. आता ते खूप गाजत आहे.

भोसरी चक्रपाणी वसाहत येथे‌ भटक्या विमुक्त जाती जमातीची अनेक कुटुंबे पालावर राहतात. पंचवीस वर्षांपासून याच एका पालातील व मूळच्या बारामतीच्या लखन गिरधारी वाईकर याची ही कथा आहे. आणि गीत आहे-‘जगदंबेचा भक्त खरा, राजा शिवछत्रपती’. कार्तिकी गायकवाड हिने ते गायले आहे. गावाकडे घर किंवा कोणतीही उपजीविका नाही. विविध अडचणींमुळे त्याचे दहावीपर्यंत शिक्षण. कविता करण्याचा छंद लागला. आत्तापर्यंत विविध चित्रपटांवर गाणी आणि विविध भाषांवर कविता तयार केल्या आहेत. तसेच विविध धार्मिक सामाजिक विषयांवर ५० हून अधिक कविता, १५ गाणी लिहिली आहेत. छत्रपती शिवाजी महाराज व त्यांच्या पराक्रमावर आधारित दोन गाणी केली असून त्यातील एक गीत सोशल माध्यमांवर प्रदर्शित झाले आहे. त्याला चांगला प्रतिसाद मिळत आहे. खासदार अमोल कोल्हे यांनीही त्याचे कौतुक केले आहे.

हवा मदतीचा हात...

सातवीत असल्यापासून मी गाणी लिहितो. दहावीत असताना कविता लिहिली. मात्र, त्या प्रसिद्ध करण्यासाठीची मदत मिळाली नाही. तरीही गाणी लिहिणे सुरूच ठेवले. कला माणसाला पुढे घेऊन जाते. असा विश्वास मला होता. तुमच्या लिखाणावर आम्ही पैसे का लावायचे असा प्रश्न अनेकांनी उपस्थित केला. गीतासाठी काढलेले कर्ज अजूनही फेडत आहे. मनमोहक या युट्युब मराठी चॅनेलवर ते प्रकाशित केले आहे, असे लखनने सांगितले.