पुणे : होर्डिंगची वर्क ऑर्डर मिळण्यासाठी १० लाखांची लाच मागितल्याप्रकरणी अटकेत असलेले पिंपरी-चिंचवड महापालिकेतील स्थायी समितीचे अध्यक्ष नितीन लांडगे यांना न्यायालयाने आज अंतरिम जामीन मंजूर केला आहे. अतिरिक्त सत्र न्यायाधीश एस. बी. हेडाऊ यांनी हा आदेश दिला.

या प्रकरणातील इतर आरोपींची न्यायालयाने न्यायालयीन येरवडा कारागृहात रवानगी केली आहे. त्यांनी देखील जामिनासाठी अर्ज केला असून त्यावर बुधवारी (ता. २५) सुनावणी होणार आहे. आरोपींची पोलिस कोठडीत संपत असल्याने त्यांना आज (ता. २३) न्यायालयात हजर करण्यात आले होते. त्यावेळी न्यायालयाने त्यांची न्यायालयीन कोठडीत रवानगी केली. त्यामुळे आरोपींनी जामिनासाठी अर्ज केला होता. ॲड. प्रताप परदेशी आणि ॲड. गोरक्षनाथ काळे यांनी लांडगे यांच्यावतीने जामिनासाठी अर्ज केला. या प्रकरणात तपास पूर्ण झालेला आहे.

अर्जदार लांडगे यांचा या गुन्ह्याशी काहीही संबंध नाही. कौटुंबिक कारणासाठी त्यांना जामीन मंजूर करण्यात यावा, असा युक्तिवाद ॲड. परदेशी आणि ॲड. काळे यांनी केला. त्यांचा युक्तिवाद मान्य करीत न्यायालयाने अंतरिम जामीन मंजूर केला आहे. इतर आरोपींच्या वतीने ॲड. विपुल दुशिंग, ॲड. कीर्ती गुजर, ॲड. संजय दळवी यांनी कामकाज पाहिले.

लाचेच्या या प्रकरणात लांडगे यांच्यासह त्यांचा पीए ज्ञानेश्वर किसनराव पिंगळे (वय ५६, रा. भोसरी), शिपार्इ अरविंद भीमराव कांबळे (रा. भीमनगर पिंपरी), संगणक आॅपरेटर राजेंद्र जयवंत शिंदे (रा. थेरगाव वाकड) आणि लिपिक विजय शंभुलाल चावरिया (रा. धर्मराजनगर) यांना अटक करण्यात आली होती. लाचलुचपत प्रतिबंधक विभागाच्या सहायक पोलिस आयुक्त सीमा मेहेंदळे या गुन्ह्याचा तपास करीत आहेत.

गुरुवारी पुन्हा हजर होण्याचे आदेश :

लांडगे यांना २६ आॅगस्टपर्यंत अंतरिम जामीन मंजूर जामीन मंजूर करण्यात आला आहे. त्यामुळे गुरुवारी (ता. २६) सकाळी ११ वाजेपर्यंत न्यायालयात हजर होण्याचे आदेश न्यायालयाने दिले आहेत.