पिंपरी : सोसायटीत सफाईचे काम करणारा चोरटा इमारतीच्या डक्टमधून चढून तिसऱ्या मजल्यावर आला. बाल्कनीतून घरात शिरून सोने-चांदीच्या दागिन्यांसह चांदीच्या देवांच्या मूर्ती असा एकूण पावणे दोन लाखांचा ऐवज लंपास केला. संशय न येण्यासाठी हा भामटा घरमालकाचाच शर्ट घालून पडला बाहेर पडला. अखेर हिंजवडी पोलिसांनी या चोरट्याला अटक केली. ही घटना बालेवाडी स्टेडियमजवळील म्हाळुंगे येथे घडली.

अक्षय अंबादास गवारे (वय २०, रा. सुसगाव, मूळ- पाथरगव्हाण, ता. पाथरी, जि . परभणी ) असे अटक केलेल्या आरोपीचे नाव आहे. याप्रकरणी चंद्रसेन अरविंद पाटील (रा. एफ ३०१ सारथी स्कायबे बालेवाडी स्टेडियममागे, म्हाळुंगे) यांनी फिर्याद दिली आहे. आरोपी हा फिर्यादी राहत असलेल्या सोसायटीत सफाईचे काम करतो. फिर्यादी व त्यांचे कुटुंबीय काही कामानिमित्त घराबाहेर पडल्यानंतर आरोपी घराची पाहणी करून गेला. सीसीटीव्ही कॅमेऱ्यात कैद होऊ नये यासाठी पुन्हा पार्किंगमध्ये जाऊन इमारतीच्या डक्टमधून तिसऱ्या मजल्यावर आला. बाल्कनीतून फिर्यादीच्या घरात शिरला.

घरातील सोने-चांदीचे दागिने, चांदीच्या देवांच्या दोन मूर्ती असा एकूण एक लाख ७६ हजारांचा ऐवज चोरला. त्यानंतर संशय न येण्यासाठी हा भामटा फिर्यादी यांचा शर्ट परिधान करून घराच्या मुख्य दरवाजातून बाहेर पडला.मात्र, सखोल तपास करून अखेर पोलिस आरोपीपर्यंत पोहोचलेच. सहायक पोलिस निरीक्षक राम गोमारे यांच्या पथकाने आरोपीला अटक केली. हिंजवडी पोलिस अधिक तपास करीत आहेत.