पिंपरी, ता. २२ : पिंपरी-चिंचवडमधील बहुप्रतिक्षित ‘रेड झोन’च्या मोजणी प्रकियाला अखेर गती मिळाली आहे. संरक्षण विभागाच्या गोला बारूद निर्माणी, खडकी प्रशासनाने रेड झोन सर्वेक्षणाला ‘ग्रीन सिग्नल’ दिला असल्‍याची माहिती आमदार महेश लांडगे यांनी दिली. भारतीय संरक्षण विभागाच्या देहू ॲम्युनिशन डेपो व दिघी मॅगझीन डेपो या भागातील ‘रेडझोन’चे मार्किंग झालेले नाही. त्यामुळे रेड झोनची मोजणी करून नकाशा प्रसिद्ध करण्यासाठी प्रशासनाने कार्यवाही करावी, असेही आमदार लांडगे यांनी सांगितले.

शहरात दिघी, भोसरी, वडमुखवाडी, तळवडे, चिखली, निगडी, रावेत, किवळे भागात रेडझोन क्षेत्र आहे. तसेच, सांगवी, पिंपळे गुरव, पिंपळे निलख, पिंपरीगाव, कासारवाडी, दापोडी या भागांना लागूनही लष्करी आस्थापना आहेत. मात्र, देहूरोड दारूगोळा कारखाना आणि दिघी मॅगझीन डेपोमुळे रेडझोन क्षेत्र जाहीर केले आहे. त्याच्या हद्दीत बांधकामे करता येत नाही. देहूरोड आणि दिघी भागात दोन रेड झोन आहेत. निवासी आणि व्यावसायिक मालमत्तांचे अचूक सीमांकन किंवा संख्या स्थानिक प्रशासनाकडे नाही. या ठिकाणी बांधकामाला मनाई करण्यात येत होती. शहरातील किमान पाच लाख नागरिक रेड झोनमुळे प्रभावित आहेत. त्यामुळे रेडझोन हद्दीच्या मोजणीची मागणी केली जात होती. त्‍यानुसार २४ मे रोजी दिघी आणि २८ मे रोजी देहूरोड येथील मोजणी होणार आहे.

‘रेडझोन’चा प्रश्न मार्गी लावण्याबाबत २०१४ पासून सातत्याने पाठपुरावा करीत आहोत. जिल्हाधिकारी प्रशासनासोबत समन्वय केला. त्याला यश मिळाले. संरक्षण विभागाच्या ‘एनओसी’ने जिल्हाधिकारी यांच्या नियंत्रणात महापालिकेच्या पथकाच्या माध्यमातून मोजणी होईल. त्यामुळे ‘रेड झोन’ची हद्द निश्चित होणार आहे. यमुनानगर, रुपीनगर, त्रिवेणीनगर, निगडी आणि तळवडे यासह दिघी, भोसरी आणि चऱ्होली येथील रेड झोन बाधित मिळकती निश्चित होणार आहेत.
- महेश लांडगे, आमदार भोसरी विधानसभा