पिंपरी : हिंजवडीतील वाहतूक कोंडी सोडविण्यासाठी पिंपरी-चिंचवड पोलिस आणि आयटी कर्मचाऱ्यांनी कोंडी होणाऱ्या ठिकाणांची संयुक्त पाहणी केली. यामध्ये हिंजवडी, माण, वाकड भागातील १० ठिकाणे वाहतूक कोंडीचे हॉटस्पॉट निश्‍चित केलेत. त्यावर पुढील दोन-तीन आठवड्यात उपाययोजना राबवल्या जाण्याची अपेक्षा आयटी कर्मचाऱ्यांकडून व्यक्त केली जात आहे.
हिंजवडी आयटी पार्कमधील विविध समस्यांसदर्भात १० जुलैला मुख्यमंत्र्यांनी विविध प्रशासकीय विभाग, अनक्लॉग हिंजवडी मोहिमेतील सदस्य व आयटी कर्मचारी संघटना यांची बैठक बोलावली होती. त्यानंतर पोलिस आयुक्त विनयकुमार चौबे यांनी दिलेल्या आदेशानुसार अतिरिक्त आयुक्त सारंग आव्हाड यांच्यासह वाहतूक पोलिस व अनक्लॉग हिंजवडी मोहिमेच्या सदस्यांनी पाहणी केली.

कोंडीवर अपेक्षित उपाययोजना
- पोर्टेबल सिग्नल उभारणे
- वाहतूक पोलिस, वॉर्डन नियुक्त करणे
- दुभाजक उभारणे
- काही चौकांत प्रवेश बंद करणे
- विरुद्ध दिशेने येणाऱ्या वाहनचालकांवर कारवाई करणे
- डावीकडे वळण्यासाठी मुक्त मार्ग ठेवणे

वाहतूक कोंडीचे हॉटस्पॉट
- मधुबन हॉटेल चौक
- शेल पेट्रोल पंप चौक (छत्रपती शिवाजी महाराज चौकापूर्वी)
- छत्रपती शिवाजी महाराज चौक
- पांडवनगर चौक
- मानदेवी मंदिर रोड (फेज ३ )
- एसईझेड भवन सर्कल (फेज ३)
- विप्रो सर्कल, फेज २
- क्रोमा चौक/ॲमस्टरडॅम हॉटेल चौक
- माइंडट्री कन्सल्टिंग चौकाजवळील जंक्शन
- भुजबळ चौकातील सेवा रस्ते

आयटी कर्मचारी व स्थानिक यांच्यासोबत अतिरिक्त आयुक्तांनी संपूर्ण आयटी पार्कचे सर्वेक्षण केले. कोंडीच्या मुख्य जागांची आम्ही माहिती देऊन कोंडी कशी टाळता येईल याबाबत सूचना दिल्या. आयटी पार्कमध्ये सुरळीत प्रवास होणे हीच माफक अपेक्षा आहे. येत्या महिन्याभरात आयटी पार्कमधील प्रवास किमान कोंडीमुक्त व्हावा ही अपेक्षा आहे.
- सचिन लोंढे, अनक्लॉग हिंजवडी
---