लोणावळा - येथील प्रसिद्ध पर्यटन स्थळ असलेल्या लायन्स पॉईंट येथून बेपत्ता झालेल्या व्यक्तीचा मृतदेह शोधण्यास शिवदुर्ग रेस्क्यू टीमला चार दिवसानंतर यश आले आहे.

संतोष शिळवणे (रा. रामनगर,लोणावळा) असे मृत व्यक्तीचे नाव आहे. गुरुवारी (ता.२८) रोजी लायन्स पॉईंट येथील सुमारे दोन हजार फूट खोल दरीत शिळवणे यांचा मृतदेहाचे अवशेष पथकास मिळून आले.

मिळालेल्या माहतीनुसार, सोमवारी (ता.२५) लायन्स पॉईंट येथून एक व्यक्ती बेपत्ता झाली असल्याची माहिती मिळाली होती. सदर व्यक्ती दरीत पडली असावी अशी शक्यता व्यक्त करण्यात आली होती. येथील शिवदुर्गच्या बचाव पथकास घटनेची माहिती मिळताच सोमवारपासूनच शोध मोहीम सुरू करण्यात आली होती.

मात्र दाट धुके आणि पाऊस यामुळे शोध कार्यात अडचण येत होती. दरम्यान खोल दरीत बेपत्ता झालेल्या व्यक्तीचा शोध घेत असताना बुधवारी दरीत उतरलेल्या बचाव पथकास कपडे आणि मृतदेहाचे काही अवयव मिळून आले होते. गुरुवारी (ता.२८) सकाळी शिवदुर्गने सकाळपासून पुन्हा शोध मोहीम सुरू केली.

अखेर चार दिवसांनंतर अत्यंत प्रतिकूल परिस्थितीत मृतदेह शोधण्यास बचाव पथकाला यश आले. पाण्याच्या प्रवाहाबरोबर मृतदेह खोल दरीत वाहून आल्याने छिन्नविछिन्न झाला होता. मोठ्या प्रयासाने मृतदेह दरीतून वर काढण्यास यश आले. याबत अधिक तपास लोणावळा ग्रामीण पोलीस करत आहेत.

शिवदुर्ग मित्र रेस्क्यू टीमचे सुनील गायकवाड, सचिन गायकवाड, योगेश उंबरे, योगेश दळवी, ओंकार पडवळ, सनी कडु, गणेश गायकवाड, अशोक उंबरे, राजेंद्र कडु, महेश मसने, आनंद गावडे, दुर्वेश साठे, आदित्य पिलाने, आयुष वर्तक, यश सोनवने, दिव्येश मुनी, सागर कुंभार, रोहित फुनसे, हर्ष तोंडे, हर्षल चौधरी, प्रविण ढोकळे, कपिल दळवी, मयुर दळवी, सुनिल क्षीरसठ, ऋषीकेश येवले, नितेश कुटे आदींच्या पथकाने ही शोध मोहीम राबवली.