मोशी - दिडशे वर्षांची परंपरा जपत बुधवारी (ता. 2) मोशीतील (Moshi) श्री नागेश्वर महाराज (Shri Nageshwar Maharaj) यांच्या भंडारा उत्सवास (Bhandara Utsav) मोठ्या उत्साहात सुरुवात झाली. यात्रेच्या अगोदरच्या दिवशी श्री नागेश्वर महाराज मंदिर, मोशी प्रवेशद्वार व तपोवनभूमी येथे विद्युत रोषणाई, फुलांच्या माळा व केळीचे खांब लावून सुंदर असे सुशोभीकरण करण्यात आले होते.

पहाटे श्री नागेश्वर महाराज यांच्या मूर्तीस देवस्थानचे विश्वस्त व ग्रामस्थ यांच्या शुभहस्ते महाअभिषेक करण्यात आला. मंदिरापासून अमराई पर्यंत महाराजांच्या पवित्र कलशाची टाळ, मृदुंगाच्या गजरामध्ये ग्रामप्रदक्षिणा घालत मिरवणूक काढण्यात आली. ही मिरवणूक गाव प्रदक्षिणा घालत गावाच्या दक्षिण भागात असलेल्या अमराईतील श्री नागेश्वर महाराज तपोवन भुमीमध्ये आणण्यात आली. याठिकाणीही देवस्थानचे विश्वस्त व ग्रामस्थ यांच्या हस्ते हा होम प्रज्वलित करण्यात आला. होम हवन झाल्यानंतर महाआरती, पुरणपोळी व शाक बुंदीच्या नैवेद्य करण्यात आला. सायंकाळी ढोल ताशांच्या गजरात महाराजांच्या छबिन्याची मिरवणूक काढण्यात आली होती.

कोरोनामुळे गेल्या दोन वर्षांपासून हा भंडारा उत्सव कोरोनाचे नियम पालन करत अत्यल्प प्रमाणात भरविण्यात आला होता. यावर्षी मात्र शासनाने कोरोना बाबतचे निर्बंध कमी केल्याने व रुग्णांचीही संख्या अत्यंत कमी झाल्याने या वर्षी हजारो भाविकांनी श्री नागेश्वर महाराज यांचे दर्शन आणि महाप्रसाद घेण्यासाठी मोठ्या प्रमाणावर गर्दी केली होती. सायंकाळी सुरु झालेल्या भंडारा महाप्रसाद वाटप प्रसंगी ग्रामस्थांनी व तरुण कार्यकर्त्यांनी मोठ्या प्रमाणात परिश्रम घेतले.

कायदा व सुव्यवस्था राखण्यासाठी एमआयडीसी पोलीस ठाणे आणि वाहतूक कोंडी होऊ नये म्हणून वाहतूक पोलिसांच्या वतीनेही मंदिर परिसरात, पुणे नाशिक महामार्ग व संपूर्ण मोशी गावामध्ये कडेकोट बंदोबस्त ठेवण्यात आला होता.

गावामध्ये सर्वत्र धामधूम, खेळण्यांचे विविध आवाज, खेळणी, खाद्यपदार्थ विक्रेत्यांची गर्दी, प्रत्येक ग्रामस्थांच्या घरी पाहुण्यांची रेलचेल, मंदिर व तपोवनभूमी परिसरामध्ये भाविकांनी श्री नागेश्वर महाराज व होमाच्या दर्शनासाठी केलेल्या रांगा, प्रसादासाठी श्रीफळ, पेढा खरेदी करणारे भाविक असे चित्र होते. सर्वत्र नागरीक उत्सव साजरा करत असताना दिसत होते.

संपूर्ण गावांसह येथून जाणारे पुणे नाशिक महामार्ग व देहू आळंदी हे दोन्ही मार्ग माणसांनी फुलून गेले आहेत. श्री नागेश्वर महाराज मंदिरांसह गावातील सर्वच मंदिरांमध्ये पवित्र मंगलमय वातावरण आहे. यात्रेच्या निमित्ताने विविध खेळ, खेळणी, गृहोपयोगी वस्तू, खाद्यपदार्थ यांची मोठ्या प्रमाणावर दुकाने लागलेली आहेत. गावातील प्रत्येक ग्रामस्थांच्या घरी पाहुण्यांची रेलचेल आहे. सायंकाळी हजारो भाविकांना बुंदी व शाकभाजीचा महाप्रसाद वाटप करण्यात येणार असल्याचे मंदिर समितीच्या वतीने सांगण्यात आले.

एमआयडीसी पोलीस ठाण्याच्या वतीने संपूर्ण यात्रा परिसरात चोख बंदोबस्त ठेवण्यात आला होता.

यात्रेचा दुसरा (ता. 3) दिवस ठरणार वैशिष्टय़पूर्ण श्री नागेश्वर महाराज यांच्या पवित्र मानाचे लिंबू, मानाचा वीडा व मानाची ओटी यांना लिलावात लागणारी लाखो रुपयांची बोली.