कोळवण : निसर्गाचे वरदान लाभल्याने मुळशी (mulshi) तालुक्यात पावसाळ्यात पर्यटनासाठी रांगा असतात; पण दोन वर्षांपासून येथील पर्यटनाला (Tourism) दृष्ट लागली आहे. यंदा कोरोना (Corona) काळातील बंदमुळे मुळशी तालुक्यात वर्षा पर्यटनही पूर्णपणे बंद झाले. लॉकडाउनमुळे (Lockdown) पर्यटक बंद झाल्याने केवळ पर्यटकांवर पोट अवलंबून असणाऱ्या व्यावसायिकांचे दोन वेळचे पोट भरणे अशक्य झाले आहे. (Mulshi Varsha Tourism Locked)

तालुक्यात पावलापावलावर शाकाहारीसह मांसाहारी जेवण देणारी हॉटेल आहेत. त्याचबरोबर घरगुती जेवण पुरवणारी अनेक घरांबरोबरच कृषी पर्यटन केंद्रेही आहेत. येथील बहुतांशी स्थानिकांचा पर्यटकांवरच उदरनिर्वाह चालतो. मोठ्या हॉटेलचालकांसह वडापाव, पाणीपुरी विक्रेते अशा पर्यटनावर आधारित अशा लहान-मोठ्या व्यावसायिकांचे मोठ्या प्रमाणावर नुकसान झाले. अनेक जणांचे लॉकडाउनमधील लाईटबिल, जागा भाडे, कामगारांचे पगार थकीत असून अनेकांना कर्ज काढून जीवन जगण्याची वेळ आली आहे.

तालुक्यातील मुळशी धरण, टेमघर धरण, ताम्हिणी घाट, पळसे धबधबा, पिंपरी पॉइंट, अंधारबन ट्रेक, प्लस व्हॅली, सहारा सिटी, लवासा सिटी, गिरीवन व पर्यटन परिसरामध्ये पर्यटनाला जाण्यासाठी बंदी केली आहे. कोरोनाचा धोका अजून टळलेला नसून रुग्ण संख्या वाढत आहे. तहसीलदार अभय चव्हाण यांनी मुळशीतील सर्व पर्यटनस्थळावर पर्यटनास बंदी घातली आहे. जेणेकरून पर्यटनामुळे कोरोना संसर्ग वाढू नये.

वन विभागाकडूनही कारवाई

याबाबत कारवाई व गुन्हा दाखल करण्याचे आदेश पौड पोलिसांना दिले आहेत. त्यानुसार मुळशी तालुक्यातील भूगाव, घोटावडे फाटा, पौड, माले, मुठा खिंड या ठिकाणी पौड पोलिस ठाण्याकडून नाकाबंदी केली आहे. पूर्णपणे चौकशी करूनच वाहने सोडली जात आहे. काही पर्यटन स्थळे वनविभागाच्या हद्दीत येत असून, सर्व पर्यटनस्थळांना संरक्षित/राखीव वनांचे सर्व नियम लागू होतात. या ठिकाणी पर्यटनासाठी येणाऱ्या पर्यटकांकडून वन विभागाचे अधिकारी कारवाई करीत आहे.