पिंपरी : प्रत्येकाला तेजोमय लख्ख प्रकाशात दिवाळी साजरी करायची असते. खऱ्या अर्थाने दिवाळी सजावटीला सुरुवात होते, ती आकाशकंदिलापासून. अगदी गोरगरिबांच्या झोपडीपासून ते टोलेजंग बंगल्यावरही आकाशकंदील लागतो. त्या पार्श्वभूमीवर पिंपरी बाजारपेठेत आकाशकंदीलाने लख्ख झळाळी आली आहे. कोरोना संसर्ग बऱ्याच अंशी कमी झाला आहे. त्यामुळे, या वर्षी बाजारपेठेत अधिक प्रमाणात आकाशकंदील खरेदीचा उत्साह दिसून आला. बाजारपेठेतील कंदिलाच्या आकर्षक डिझाइन ग्राहकांचे लक्ष वेधून घेत आहेत.

पिंपरी-चिंचवड बाजारपेठेत आकाशकंदील छोटे-मोठे मिळून, किरकोळ विक्रेते ५० ते ६० आहेत. यावर्षी डिझेल महागल्याने वाहतूक खर्चही वाढला आहे. त्यामुळे, पुणे तसेच पिंपरी चिंचवडमध्ये किरकोळ विक्रेत्यांनी कंदिलामागे दहा टक्क्यांनी किमती वाढविल्या आहेत. तसेच जीएसटीचाही खर्च आहे. अंदाजे १०० ते १२५ प्रकार कंदिलामध्ये बाजारपेठेत उपलब्ध आहेत. यामध्ये हॅंडमेड व रेडीमेड तसेच पारंपरिक कंदिल विक्रीसाठी आहेत. हॅंडमेड कंदील काही अंशी महाग आहेत तर रेडीमेड कंदील ५० रुपयांपासूनपुढे विक्रीला आहेत. यातही लहान, मोठे तसेच जम्बो कंदील विक्रीला आहेत. याच्या किमती ५५० रुपयांपर्यंत आहेत. कागदी, प्लॅस्टिक, तसेच कापडी कंदील विक्रीला आहेत.

वेलवेट, बलून व थ्रीडींनाही मागणी

आकाशकंदिलाच्या किमती ६० रुपयांपासून ते ८०० रुपयांपर्यंत आहेत. तसेच छोटे कंदीलही डझनमध्ये विक्रीला आहेत. यामध्ये कुंदन, जाळीचे, लाकडी, झुरमुळ्या, वेलवेट, बलून, थ्रीडी व सर्वाधिक मागणी असलेले पारंपरिक कंदील बाजारपेठेत आले आहेत. त्याचबरोबर राजवाडी हंडी, चटई फ्लॉवर, पाकळ्या, षटकोनी, कॅनव्हास प्रिंटेड, खणाच्या डिझाइनमधील व इको फ्रेंडली कंदील बाजारपेठेत आले आहेत.

"कोरोनामुळे बाजारपेठ काही अंशी थंडावली आहे. सकाळी साडेआठपासून दुकान लावले आहे. परंतु, या वर्षी ग्राहक दर पाडून मागत आहेत. पुढील आठवड्यात विक्री मोठ्या प्रमाणात होण्याची चिन्हे आहेत."

- हेमलता मांडगे, आकाशकंदील विक्रेत्या, पिंपरी कॅम्प