पिंपरी : एरवी जून महिन्यात पालक आणि मुलांचीही शाळेची तयारी सुरू होते. त्यांना नव्या शालेय वर्षाचे वेध लागतात. शाळा किती तारखेपासून सुरू होणार, नवी कोरी पुस्तकं, वह्या, ड्रेस, दप्तरं वगैरे, काही खराब झालेल्या वस्तू नव्याने घेणे. मात्र, यंदा कोरोनामुळे शाळा नेहमीप्रमाणे जूनमध्ये सुरू होणार नाहीत. त्या कधी सुरू होतील, हे देखील अनिश्चित आहे. परिणामी यावर्षी शालेय साहित्य खरेदीची लगबग दिसत नसल्याने दुकाने ओस पडली आहेत.

ताज्या बातम्यांसाठी डाऊनलोड करा ई-सकाळचे ऍप 

दरवर्षी जून महिन्यात शैक्षणिक वर्ष सुरू होते.  मे महिन्याच्या अखेरीसच बाजारपेठेत शालेय साहित्य आलेले असते. परंतु, यंदा लॉकडाऊनमुळे अद्यापही शालेय साहित्याचे उत्पादनच सुरू झालेले नसल्याचे उत्पादक राजेश नहार यांनी सांगितले. शैक्षणिक वर्ष जुलै महिन्यापासून सुरू होते. याबद्दलही स्पष्टता नाही. तरीही फी पेंडिंग, फी भरा म्हणून न चुकता मेसेज पाठवणाऱ्या शाळांनी यावर्षी 'एक्स्ट्रा चार्जेस' आकारून घरपोच वह्या पुस्तके पोचवली आहेत. 

पिंपरी चिंचवडच्या बातम्या वाचण्यासाठी येथे ► क्लिक करा

पिंपरी कॅम्पमध्ये शालेय साहित्याची बाजारपेठेतील अनेक दुकानांत शालेय साहित्य विक्रीस असते. लहान मुलांची दप्तरे, सॅक, वह्या, पुस्तके, कंपास बॉक्स, नकाशा व अन्य साहित्य येथूनच खरेदी करण्यासाठी दरवर्षी पालकांची गर्दी होते. परंतु, यंदाच्या वर्षी काहीच हालचाल नाही. शैक्षणिक वर्ष सुरू केव्हा होणार याबद्दल पालक आणि विद्यार्थ्यांमध्ये संभ्रमावस्था आहे. शासनानेही याबाबत अजूनही काहीच निर्णय दिलेला नाही.

पुण्याच्या बातम्या वाचण्यासाठी येथे ► क्लिक करा 

बहुतांश भाग कंटेन्मेंट झोन असल्याने तेथील  दुकाने उघडण्यासही मनाई आहे. शाळांचे निकाल जाहीर झाल्यानंतरच मे महिन्याच्या पहिल्या आठवड्यापासूनच शालेय साहित्याचा स्टॉक दुकानदार करून ठेवतात. यंदा मात्र काहीच हालचाल नसल्याने विक्रेते हातावर हात ठेवून बसले असल्याचे विक्रेते जिग्नेश ललवाणी यांनी सांगितले.

"यावर्षी कच्चा माल नाही, वाहतुकीसाठी कामगार नाहीयेत, त्यामुळे कागदाचे दर वाढल्याने यावर्षी वह्यांचे दर 25 ते 30 टक्के वाढण्याची शक्यता आहे." 
-राजेश नहार, वह्यांचे उत्पादक