भोसरी, ता. १३ ः ‘‘तरुणींनी जिजाऊंचे विचार अनुसरून आपले जीवन घडवावे. तरच उद्या घराघरांत छत्रपती शिवाजी महाराज जन्माला येतील. शिवाजी महाराजांना स्वराज्याचे स्वप्न सत्यात उतरविण्याची प्रेरणा जिजाऊंनी दिली. स्वाभिमानाने संस्कार जिजाऊंनी छत्रपती शिवाजी महाराजांवर केले,’’ असे मत व्याख्याते गणेश पाटील यांनी व्यक्त केले.
भोसरीतील लांडेवाडेतील राजमाता जिजाऊ शिक्षण प्रसारक मंडळाचे कला, वाणिज्य व विज्ञान महाविद्यालयात ‘जिजाऊ ते सावित्री सन्मान महाराष्ट्राच्या लेकीचा’ या अभियानांतर्गत संस्थेच्या क्लब शंभर, सांस्कृतिक विभाग आदींद्वारे राजमाता जिजाऊ मॉसाहेब व स्वामी विवेकानंद यांची जयंती उत्साहात साजरी करण्यात आली. यावेळी ते बोलत होते. अध्यक्षस्थानी माजी आमदार विलास लांडे होते. महाविद्यालयाचे प्राचार्य डॉ. अशोक पाटील यांच्यासह शिक्षकवृंद आणि विद्यार्थी उपस्थित होते.
लांडे म्हणाले, ‘‘राजमाता जिजाऊ यांचा महाराष्ट्राच्या जडणघडणीत सिंहाचा वाटा आहे. स्वामी विवेकानंदांच्या विचारांतून तरुण-तरुणींनी राष्ट्र उद्धारांचे कार्य करावे. तरुणांनी स्वतःसह कुटुंब व समाजाचा विकास करावा.’’ अश्विनी कुडेकर, दिव्या कांबळे, संगीता थोराजी, उत्कर्षा कोकीळ आदींनीही विचार व्यक्त केले. काजल प्रजापती हिने राजमाता जिजाऊंवरील गीत सादर केले. सूत्रसंचालन डॉ. नेहा बोरसे यांनी केले. प्रा दीपक पावडे यांनी आभार मानले.