01190

-----
स्पर्धा परीक्षा केंद्र उभारावे
खासदार धैर्यशील माने; रुकडीमध्ये विकासकामांचा प्रारंभ
रुकडी, ता. २० : हे गाव ऐतिहासिक वारसा जोपासणारे गाव आहे. डॉ. बाबासाहेब आंबेडकर यांच्या पदस्पर्शाने पावन झालेली ही भूमी आहे. डॉ. बाबासाहेबांची पुण्याई म्हणून त्यांच्या जयंतीनिमित्त सामाजिक घटकांचा विकास साध्य करण्यासाठी उपलब्ध झालेल्या निधीतून विविध विकासकामांचे उद्‍घाटन करण्याचे मला भाग्य लाभले. १०१ वर्षांच्या जुन्या बौद्ध समाज मंदिराची नवीन इमारत उभी करत असताना एखादे स्पर्धा परीक्षा केंद्र उभे व्हावे. जेणेकरून बहुजन समाजाचा युवक शासकीय अधिकारी बनेल, असे मत खासदार धैर्यशील माने यांनी व्यक्त केले. रुकडी येथे विविध विकासकामांचे उद्‍घाटन व नवीन कामाच्या प्रारंभप्रसंगी ते बोलत होते.
खासदार माने यांच्या प्रयत्नातून तब्बल दोन कोटी २८ लाखांच्या निधीतून बौद्ध समाज, रमामातानगर, भीमनगर, बौद्ध समाज स्मशानभूमी बांधकाम व कंपाऊंड, अनुसूचित जाती-जमाती व नवबौद्ध मातंग समाज, चर्मकार समाज येथे हायस्मार्ट दिवे बसवण्यात आले. अशा विविध विकासकामांचे उद्‍घाटन तसेच ग्रामपंचायत पंधराव्या वित्त आयोगातून मंजूर झालेल्या विकासकामांचा प्रारंभ केला. आमदार राजूबाबा आवळे म्हणाले, ‘सर्व धर्म समान मानून समाजातील सर्व घटकांना न्याय मिळवण्याच्या दृष्टिकोनातून कार्य करीत राहीन.’ माजी सरपंच नंदकुमार शिंदे यांनी मनोगत व्यक्त केले.
यावेळी सरपंच रफिक कलावंत, रणजित कदम, एस. पी. कांबळे, नंदकुमार शिंदे, शमवेल लोखंडे आदी उपस्थित होते.