पिंपरी, ता. २ : गाडीचा धक्का लागल्याने झालेल्या वादात तरुणाचा खून झाल्याची घटना चिखली येथे घडली. याप्रकरणी पोलिसांनी दोन अल्पवयीन मुलांना ताब्यात घेतले आहे.
सुनील शिवाजी सगर (वय ३५, रा. कॉलनी क्रमांक २, जाधववाडी, चिखली) असे खून झालेल्या तरुणाचे नाव आहे. त्यांच्या पत्नीने फिर्याद दिली आहे. त्यानुसार १४ व १७ वर्षीय मुलांना पोलिसांनी ताब्यात घेतले आहे. शुक्रवारी (ता. ३१) सायंकाळी पावणेसातच्या सुमारास सुनील हे कामावरून घरी येत होते. तर आरोपी दुचाकीवरून जात होते. त्यावेळी जाधववाडी शिवरस्ता येथे दुचाकीचा सुनील यांना धक्का लागला. त्यामुळे सुनील यांनी एकाच्या कानशिलात मारली. याचा राग आल्याने दोघांनी त्यांना मारहाण केली. त्यामुळे सुनील पळत जान बोल्हाईमळा कॉलनी क्रमांक सहा येथील किराणा दुकानात शिरले. तिथे सतरा वर्षीय मुलाने सुनील यांना दुकानाबाहेर ओढून काढले व दोघांनी मारहाण केली. त्यांच्या डोक्यात दोन ते तीन वेळा दगड मारल्याने रक्तस्त्राव होऊन गंभीर जखमी झाले. घटनास्थळी गर्दी झाल्याने दोघेही पळून गेले होते. पोलिसांनी घटनास्थळी दाखल होऊन सुनील यांना रुग्णालयात दाखल केले. मात्र, त्यापूर्वीच त्यांचा मृत्यू झाल्याचे डॉक्टरांनी सांगितले.
दरम्यान, गुन्ह्यात वापरलेल्या दुचाकीच्या क्रमांकावरून पोलिसांनी मालकाचा शोध घेतला. ती भोसरी येथील बिरेंद्र चव्हाण यांची होती. त्यांच्या घरी चौकशी केल्यानंतर त्यांचा मुलगा विजयने त्याच्या मित्रांना दुचाकी दिल्याचे सांगितले. त्यानुसार दोन्ही अल्पवयीन मुलांना पोलिसांनी ताब्यात घेतले. चौकशीत त्यांनी गुन्ह्याची कबुली दिल्याचे चिखली पोलिसांनी सांगितले.
--