पुणे ः प्रजासत्ताक दिनानिमित्त घेतले जाणारे राष्ट्रध्वज नंतर इतस्ततः पडून त्याचा अवमान होऊ नये, म्हणून भारत फ्लॅग फाउंडेशनने पुढाकार घेतला आहे. नागरिकांना असे ध्वज आढळल्यास ते पासोड्या मारुती मंदिरासमोरील फाउंडेशनच्या कार्यालयात जमा करावेत, असे आवाहन फाउंडेशनचे संस्थापक गिरीश मुरुडकर व कार्यकारी अध्यक्ष राहुल भालेराव यांनी केले आहे. १५ ऑगस्ट आणि २६ जानेवारी या दिवशी अनेकजण राष्ट्रध्वज विकत घेऊन मोठ्या अभिमानाने मिरवतात; मात्र हेच कागदी आणि प्लास्टिकचे राष्ट्रध्वज त्याच दिवशी रस्त्यावर, कचऱ्यात किंवा गटारात पडलेले आढळतात. प्लास्टिकचे ध्वज लवकर नष्टही होत नाहीत, त्यामुळे अनेक दिवस या राष्ट्रध्वजाची विटंबना होते. ही विटंबना रोखण्यासाठी फाउंडेशनने पुढाकार घेतला असून या उपक्रमाचे हे एकविसावे वर्ष आहे. यात जमा झालेल्या साहित्याची शास्त्रशुद्ध, सन्मानपूर्वक पद्धतीने विल्हेवाट लावली जाते, अशी माहिती मुरुडकर यांनी दिली.