सोमाटणे, ता. १४ ः प्रवेश बंदमधून पुणे-मुंबई द्रुतगती मार्गाला वाहन घुसविणाऱ्या वाहनचालकांवर पोलिसांची करडी नजर असून, दंडातून सुटका नाही.
सोमाटणे टोलनाक्यावरील टोलवसूलीपासून सुटका करण्याच्या उद्देशाने पुण्याकडे जाणारे अनेक वाहनचालक द्रुतगती मार्गावरील सोमाटणे बाह्यमार्गातून वाहने आत घुसवतात व पुण्याकडे जातात. या प्रकारातून यापूर्वी येथे अनेक अपघात घडले असून, गेल्या दोन दशकांत दहा जणांचा मृत्यू झाला होता तर अनेक जण जखमी झाले होते. गेल्या दोन वर्षांपासून येथे अपघात होण्याचे प्रमाण आणखी वाढले होते, याची दखल घेऊन महामार्ग पोलिसांनी प्रवेश बंदमधून वाहन घुसविणाऱ्या वाहन चालकावर दंडात्मक कारवाई तीव्र केली आहे. यासाठी दिवसभर पोलिसांचे एक पथक सोमाटणे बाह्यमार्गाजवळ तैनात करण्यात आले आहे. या पोलिस पथकाकडून प्रवेश बंदमधून वाहन घुसविणाऱ्यावर तत्काळ दंडात्मक कारवाई केली जाते. रोखीने दंडाची पावती न फाडणाऱ्या वाहनचालकांच्या वाहनाचा फोटो काढून तो परिवहन विभागाला दंडासाठी पाठवणे ही कारवाई सुरू करण्यात आली असून नियम मोडणाऱ्यांवर पोलिसांची करडी नजर आहे. या कारवाईमुळे प्रवेश बंदमधून वाहने द्रुतगती मार्गाला घुसविणाऱ्या वाहनचालकांत भीती निर्माण झाली आहे. पोलिसांची नजर चुकवून काही वाहनचालक प्रवेश बंदमधून वाहने घुसवून सुसाट पळण्याचा प्रयत्न करतात, अशा वाहन चालकांच्या वाहनाचे फोटो काढून ते दंडासाठी परिवहन विभागाला पाठवणे सुरू केल्याने वाहन चालकांची दंडातून सुटका नाही.

५५६५४, ५५६५५

Smt13Sf1,2