ऊर्से, ता. १७ : स्माईल व्यसनमुक्ती केंद्रात दहीहंडी उत्सव उत्साहात साजरा करण्यात आला. स्माईलची ही अनोखी आणि वेगळी दहीहंडी दरवर्षीप्रमाणे यंदाही पाहण्यासारखी ठरली. स्माईलचे संस्थापक हर्षल पंडित यांच्या संकल्पनेतून दरवर्षी विहिरीवर विशेष पद्धतीने दहीहंडी बांधली जाते. केंद्रातील रुग्णमित्र विहिरीच्या काठावरून उडी मारून ती फोडण्याचा प्रयत्न करतात आणि जल्लोषात हा उत्सव साजरा करतात. यंदाही सर्व रुग्णमित्रांनी उत्साहात सहभाग घेतला. गाणी गात, नाचत आणि जलतरणाचा आनंद घेत त्यांनी दहीहंडी फोडली. याप्रसंगी सीआरपीएफ तळेगावचे अधिकारी तसेच अमली पदार्थ विरोधी पथक पिंपरी-चिंचवड येथील अधिकारी उपस्थित होते. यावेळी  व्यसनामुळे होणारे दुष्परिणाम यावर माहिती देण्यात आली. याप्रसंगी जोशी यांनी स्माईलच्या विविध सामाजिक उपक्रमांविषयी माहिती दिली. कार्यक्रम यशस्वितेसाठी राहुल बोरुडे, रोहन यादव, नितीन नाटेकर, प्रणव देशमुख, अनिल सावंत, राहुल केळकर, आनंद भागवत, अजिंक्य देशपांडे यांचे सहकार्य लाभले.