भोसरी, ता. २७ ः दिघी येथे नागपंचमीच्या तोंडावर दुर्मीळ असणारा ‘अल्बिनो’ गवत्या साप सापडला. सर्पमित्रांद्वारे त्याला पकडून सुरक्षित ठिकाणी सोडून देण्यात आले. शरीरातील रंगद्रव्यांच्याअभावी तो हलक्या पांढऱ्या रंगाचा असल्याचे दिसून आले.
दिघीतील परांडेनगरात सचिन परांडे यांच्या घराजवळ पांढऱ्या रंगाचा साप दिसल्याने त्यांनी सर्प मित्र प्रशांत नाईकरे यांच्याशी संपर्क साधला. नाईकरे यांनी घटनास्थळी धाव घेत सापाला पकडून सुरक्षित ठिकाणी जंगलात सोडले.
नाईकरे म्हणाले, ‘‘हा बिनविषारी गवत्या साप आहे. मुळात त्याचा रंग पिवळसर हिरवा असतो. मात्र, रंगद्रव्या अभावी या सापाचा रंग पांढरा झाला आहे, असे साप दुर्मीळ असतात. मात्र, त्यांचा पांढरा रंग पर्यावरणाशी जुळत नसल्याने ते भक्षकाच्या निदर्शनास तत्काळ येतात. त्यामुळे ते जास्त दिवस जगत नाहीत. सध्या पावसाळा सुरू आहे. पावसाळ्यात काही साप अंडी घालतात. त्यामुळे काही सापांचा हा प्रजनन प्रक्रियेचा काळ असतो. या काळात सापाच्या अंड्यातून पिल्ले बाहेर पडतात. ती नागरी वस्ती आणि परिसरातही येऊ शकतात. मात्र नागरिकांनी त्यांना मारू नये. मुळात साप हा अत्यंत भित्रा प्राणी आहे. त्याला असुरक्षित वाटल्यावरच तो चावा घेतो. नागरिकांना त्याला न घाबरता परिसरातील सर्पमित्रांशी संपर्क साधावा.’’

काय आहे ‘अल्बिनो’ ?
‘अल्बिनो’ हा सापांना होणाऱ्या एक प्रकारच्या आजाराचे नाव आहे. या प्राण्यांच्या शरीराचा रंग हा रंगद्रव्याच्या अभावी फिकट किंवा पांढरट असतो. लॅटिन भाषेत ‘अल्बस’ या शब्दाचा अर्थ ‘पांढरा’ असा होतो. त्यावरून हा शब्द आला आहे. परंतु या प्राण्यांमध्ये रंगद्रव्याचा पूर्ण अभाव नसून फक्त कमतरता असते. त्यामुळे ते पांढरेशुभ्र न दिसता त्या प्राण्याच्या मूळ रंगापेक्षा फिकट रंगाचे असतात. काही जनुकीय बदलांमुळे त्यांच्या शरीरात जन्मतःच रंगद्रव्यांची कमतरता असते.