चाकण, ता. १६ ः विधानसभेच्या पावसाळी अधिवेशनादरम्यान उपमुख्यमंत्री एकनाथ शिंदे यांची भेट चाकण (ता. खेड ) येथील महाराष्ट्र प्रदूषण नियंत्रण मंडळाचे सदस्य नितीन गोरे यांनी घेऊन चाकणची वाहतूक कोंडी सोडविण्यासाठी साकडे घातले.
यावेळी नितीन गोरे यांनी चाकण परिसरातील रस्त्यांच्या दुरवस्थेबाबत निवेदन सादर केले. नागरिकांना, कामगारांना दररोज भेडसावणाऱ्या वाहतूक कोंडी, अपुरे रस्ते आणि वाढत्या अपघातांच्या घटनांची गंभीरता उपमुख्यमंत्री शिंदे यांच्या निदर्शनास आणून दिली. वारंवार आंदोलने करूनही प्रशासन दुर्लक्ष करत असल्याबद्दल त्यांनी नाराजी व्यक्त केली. यावेळी उपमुख्यमंत्री शिंदे यांनी दखल घेऊन तळेगाव-चाकण-शिक्रापूर मार्गाची स्वतः पाहणी करून लवकरात लवकर विस्तारीकरणाचे काम सुरू करण्याचे आश्वासन दिले. पुणे-नाशिक महामार्गावरील परिस्थितीबाबत संबंधित अधिकाऱ्यांना तत्काळ फोन करून कार्यवाहीचे आदेश दिले. लवकरच मुख्यमंत्र्यांना ही बाब लक्षात आणून देणार आहे. त्यांच्या अध्यक्षतेखाली बैठक घेऊन या मार्गाच्या विस्तारीकरणासाठी निविदा प्रक्रिया तत्काळ सुरू करण्यासाठी प्रयत्न करणार असल्याचेही शिंदे यांनी स्पष्ट केले,
असे गोरे यांनी सांगितले.

----------------------
08835.