चिंचवड, ता. ७ ः श्री वर्धमान जैन स्थानकवासी संघाच्यावतीने यंदाच्या आध्यात्मिक चार्तुमासानिमित्त साध्वी प.पू. चंदनबालाजी आणि साध्वी प.पू. पद्मावतीजी यांचा चिंचवडमध्ये (ता.५) मंगल प्रवेश झाला. या प्रसंगी भक्तिभावपूर्ण वातावरणात भव्य मिरवणूक, स्वागत समारंभाचे आयोजन करण्यात आले.
मिरवणुकीची सुरुवात संघाचे कार्याध्यक्ष राजेंद्र जैन यांच्या निवासस्थानापासून झाली. तानाजीनगर, गांधी पेठ, केशवनगर मार्गे कल्याण प्रतिष्ठानच्या ‘सुखी भवन’ येथे तिचा समारोप झाला. मिरवणुकीत ‘चोवीस तीर्थंकार’ व ‘सोलह सतीया’ च्या वेशभूषेतील महिला, युवक व भगिनी मोठ्या संख्येने सहभागी झाले. जैन आगम ग्रंथाची प्रतिष्ठापना व धर्मध्वजाचे पूजनही करण्यात आले. मिरवणुकीचे आयोजन जैन श्रावक संघ, वीर विशाल संघ, अरिहंत महिला मंडळ व युवक - युवती मंडळ यांच्या सहकार्याने करण्यात आले. प्रवचन सत्रात साध्वी पद्मावतीजींनी चार्तुमासातील तप, आराधना व जपनामाचे महत्त्व स्पष्ट केले; तर साध्वी वितरागवंदनाजींनी अहिंसा व परिग्रह यांचे विवेचन केले.
कार्यक्रमाच्या अध्यक्षस्थानी अशोक बागमार होते. महामंत्री नंदकुमार लुणावत यांनी कार्यक्रमांची माहिती दिली. प्रसिद्धी प्रमुख मनोज बाफना यांनी साध्वीश्रींचा परिचय करून दिला. यावेळी दिलीप नहार, कोल्हारचे नंदकुमार भटेवरा, आंबेगावचे बाळासाहेब धोका, जामखेड येथील राजेंद्र कोठारी, संजय कोठारी आदी मान्यवर उपस्थित होते.
प्रवचनमालेत ‘सुखी जीवन’, ‘चरित्र निर्माण’ व ‘समत्व साधना’ यासारख्या विषयांवर मार्गदर्शन होणार आहे. प्रभातफेरी, ध्यानसत्र, भजनसंध्या आदी कार्यक्रमांनी चार्तुमास अधिक अर्थपूर्ण होणार आहे. धार्मिक जागृतीबरोबरच युवकांना जीवन मूल्यांचे महत्त्व पटवून देण्यासाठी विविध उपक्रम राबवण्यात येणार असल्याचे संयोजकांनी सांगितले.
संतोष धोका यांनी सूत्रसंचालन केले; तर धर्मेश कुमठ यांनी आभार मानले.

CWD25A01503