चिंचवड, ता. ९ ः श्री मोरया गोसावी समाधी मंदिर परिसरात सांस्कृतिक वारशाच्या (हेरिटेज) नावाखाली तयार करण्यात आलेला दगडी रस्ता नागरिकांसाठी मोठ्या त्रासाचे कारण ठरत आहे. उखडलेली फरशी, साचलेले पाणी आणि अपूर्ण कामांमुळे स्थानिक रहिवासी आणि दर्शनासाठी येणारे भाविक हैराण झाले आहेत. पादचारी, वाहनचालक, ज्येष्ठ नागरिकांना इथे दुखापती होत आहेत.
या रस्त्याचे काम सुरू करण्याआधी महापालिकेचे अधिकारी व नगरसेवक यांनी लखनौ येथे पाहणी दौरा केला होता. मात्र, प्रत्यक्षात येथील काम करण्यासाठी आलेले कारागीर काहीच दिवसांत पळून गेले. त्यानंतर स्थानिक मजुरांकडून रस्ता कसा तरी पूर्ण करण्यात आला. मात्र, अत्यंत चुकीच्या पद्धतीने हा रस्ता बनविण्यात आला. या ओबडधोबड रस्त्यावरून चालणे म्हणजे धोक्याचा प्रवास ठरत आहे. पादचाऱ्यांना चालताना किंवा दुचाकीवरून जाताना पाय घसरून किंवा रस्त्यात वर - खाली असणाऱ्या दगडांना धडकून अपघात होण्याचे प्रमाण मोठे आहे.

खराब व ओबड-धोबड रस्त्याची तातडीने दुरुस्ती न झाल्यास आम्हा सर्व नागरिकांना रस्त्यावर उतरावे लागेल. रस्ता रोको आंदोलन करण्याची वेळ येईल. त्यामुळे महापालिकेने त्यावर लवकर मार्ग काढावा.
- अनिल लांडगे, स्थानिक रहिवासी

‘हेरिटेज’चे रस्ते कसे असतात ? हे आम्हा चिंचवडच्या नागरिकांना चांगलेच माहीत आहे. हा असला ओबडधोबड दगडी रस्ता काढून सुरळीत व सुरक्षित रस्ता तयार करावा. रस्त्याची चौकशी करून दोषींवर कारवाई करावी.
- सूरज भोईर, स्थानिक रहिवासी

श्री मोरया गोसावी मंदिरासमोरील रस्त्याची आम्ही पाहणी केली आहे. संबंधित ठेकेदाराला रस्त्याच्या दुरुस्ती संदर्भात सूचना दिल्या आहेत. लवकरच हा रस्ता दुरुस्त करण्यात येईल.
- चंद्रकांत मुठाळ, कार्यकारी अभियंता (स्थापत्य), ‘ब’ क्षेत्रीय कार्यालय