चिंचवड, ता. २५ ः भोईर नगर चौकात महावितरणने पूर्वपरवानगी न घेता तांत्रिक दुरुस्तीच्या कामासाठी रस्त्याचे खोदकाम केले. त्यानंतर आठ ते दहा दिवस उलटूनही रस्ता पूर्ववत करण्यात आलेला नाही. त्यामुळे पादचारी तसेच वाहनचालकांना रोज वाहतूक कोंडीसह अनेक अडचणींचा सामना करावा लागत आहे.
बऱ्याच शाळांच्या बस इथून जात असतात. त्याशिवाय बऱ्याच महिला आणि पालकांना आपल्या मुलांना शाळेत सोडण्यासाठी या रस्त्याचा वापर करावा लागतो. त्यामुळे या रस्त्याचे काम तातडीने करावे. अन्यथा गंभीर अपघात होऊ शकतो.
चौकात नेहमी वर्दळ असते. कुठेही खोदकाम झाले तरी वाहतुकीत अडथळे येतात. त्यातच महावितरणमुळे नेहमीचा असे घडत असल्याची नागरिकांची तक्रार आहे. कोणतेही तांत्रिक काम करण्यासाठी रस्ता खोदायचा, पण काम झाल्यानंतर रस्ता पूर्ववत करण्याची जबाबदारी मात्र झटकून टाकायची अशीच महावितरणची तऱ्हा असल्याची तीव्र प्रतिक्रिया अनेक नागरिकांनी व्यक्त केली. वास्तविक जो भाग खोदला आहे त्याचे डांबरीकरण लवकरात लवकर पूर्ण करणे आवश्यक आहे. तसे होत नसल्यामुळे अनेकदा अशा रस्त्यांची दुरुस्ती करण्याचा बोजा विनाकारण महापालिकेच्या स्थापत्य विभागावर पडतो.
---
‘उद्या करू, परवा करू’
भोईर नगरमधील खोदकामाच्या संदर्भात महावितरणच्या अधिकाऱ्यांशी संपर्क साधला असता, ‘उद्या करू, परवा करू’, अशी उत्तरे देऊन बोळवण करण्यात आली. प्रत्यक्षात त्याठिकाणी कोणत्याही कामाला अजून सुरवात झालेली नाही.
---
कोणतीही परवानगी न घेता बिजलीनगर महावितरणच्या अधिकाऱ्यांनी हा रस्ता खोदला आहे त्यांना रस्ता करण्यासंदर्भात वारंवार सूचना दिल्या आहेत वास्तविक ज्यांनी रस्ता खोदला आहे त्यांनी तो पूर्ववत करून देणे आवश्यक आहे. आम्ही त्यांच्याशी पत्रव्यवहार केला आहे की विनापरवाना रस्ता खोदला आहे तो आपण लवकर पूर्ण करावा असे सांगितले आहे.
- मीनल दोडल, उपअभियंता स्थापत्य, ‘अ’ क्षेत्रीय कार्यालय
---
या ठिकाणी रस्त्याची दुरुस्ती केली होती असे समजले आहे तरीदेखील दुरुस्ती झाली नसेल तर अधिकाऱ्यांना सांगून तो रस्ता पूर्ववत करण्यासाठी सूचना देण्यात येतील.
- दिवाकर देशमुख, अतिरिक्त कार्यकारी अभियंता, बिजलीनगरचे महावितरण कार्यालय
---