चिंचवड, ता. ८ : संत ज्ञानेश्वर महाराजांचा ७५० वा संजीवन समाधी सोहळा व संत तुकाराम महाराजांचा ३७५ वा वैकुंठ गमन सोहळा यांचे औचित्य साधून वाल्हेकरवाडी, चिंचवड येथील श्री महादेव मंदिरात पिंपरी चिंचवड, पुणे, मुळशी, मावळ, हवेली परिसरांतील निरपेक्ष वारकरी मंडळी आयोजित नामसंकीर्तन महोत्सव आयोजित करण्यात आला. यावेळी कलश, वीणा, पताका तसेच ग्रंथपूजन वारकऱ्यांच्या हस्ते झाले.
या महोत्सवात दररोज काकड आरती, ज्ञानेश्वरी पारायण, तुकाराम गाथा पारायण, शिवलीलामृत कथा, हरिपाठ, हरिकीर्तन व हरिजागर असे नित्य धार्मिक कार्यक्रम पार पडले. गेले सात दिवस गणेश महाराज गायकवाड, गौरव महाराज ढोरे, श्रीकांत महाराज पातकर, प्रमोद महाराज पवार, लहू महाराज जमदाडे, अनिकेत महाराज मोरे आणि चंद्रकांत महाराज वांजळे यांच्या कीर्तनरूपी सेवांनी भक्तिमय वातावरण निर्माण झाले होते. महोत्सवाची सांगता शुक्रवारी सकाळी गणेश महाराज कार्ले, पुणे यांच्या काल्याच्या कीर्तनाने झाली. महोत्सवाचे व्यवस्थापन प्रमोद महाराज पवार व विशाल महाराज गडगुळ व मिलिंद वाल्हेकर यांनी केले. वाल्हेकर व शिवले परिवाराने या कार्यक्रमाला सहकार्य केले.