चिंचवड, ता. १४ ः चिंचवडगावचे ग्रामदैवत श्री काळभैरवनाथ महाराज यांचा जन्मोत्सव आणि काकडा आरती सांगता सोहळा उत्साहात झाला. विविध धार्मिक, सांस्कृतिक आणि कीर्तन सेवांनी चिंचवडगावाला भक्तीमय वातावरण लाभले.
कोजागरी पौर्णिमेपासून सुरू झालेल्या काकडा आरती महोत्सवात महिनाभर पहाटे आरती, भजन, प्रवचन असे कार्यक्रम पार पडले. अष्टमीला काकडा आरतीची सांगता झाली. शेखर रबडे व ब्रह्मवृंद यांच्या मंत्रोच्चारात काळभैरवनाथ-जोगेश्वरी, विठ्ठल-रुक्मिणी देवतांचे महाअभिषेक झाले. त्यानंतर टाळ-मृदुंगाच्या गजरात दिंडीने हनुमान मंदिर, राम मंदिर, विठ्ठल-महादेव मंदिर, गांधी पेठ मार्गे दत्त मंदिर व मोरया समाधी मंदिर घाटावर काकड्याचे विसर्जन केले. पहिल्या दिवशी मधुकर महाराज मोरे यांचे भजन-कीर्तन तर दुसऱ्या दिवशी चैतन्य महाराज निंबोळे (नाशिक) यांचे काल्याचे कीर्तन झाले. ‘काल्याची हंडी’ फोडल्यावर महाआरती आणि महाप्रसादाचे वाटप झाले.
उत्सव समितीच्या वतीने आयोजित रक्तदान शिबिरात १२७ रक्तदात्यांनी सहभाग नोंदवला. यावेळी चिंचवड गावातील विविध क्षेत्रात कामगिरी करणाऱ्या आयर्नमॅन स्वप्नील चिंचवडे, चैतन्य बेणारे, समृद्धी भोईर, इतिहास संशोधक ब. ही. चिंचवडे, नीलेश गावडे, तहसीलदार जयराज देशमुख, एमपीएससीत मुलींमध्ये राज्यात द्वितीय क्रमांक विजेती ममता औटी, प्रांत अधिकारी डॉ. यशवंत माने, वैशाली देशमाने, काश्वी गायकवाड, कार्तिकी ननावरे, पोलिस उपायुक्त विठ्ठल कुबडे, वरिष्ठ पोलिस निरीक्षक अंकुश बांगर आदींचा सन्मान करण्यात आला.
सायंकाळी काळभैरवनाथ अष्टकाची २१ आवर्तने करून आरती तसेच धनेश्वर एकतारी भजन मंडळाची सेवा झाली. रात्री १२.३० वाजता काळभैरवनाथ महाराजांचा पाळणा हलवून जन्मोत्सव साजरा करण्यात आला.