चिंचवड, ता. ८ ः डाक विभागाने डिजिटल माध्यमातून नागरिकांना अत्याधुनिक, सुलभ, वेगवान, ग्राहक केंद्रित आणि विश्वासार्ह डिजिटल पोस्टल सुविधा देण्याच्या उद्देशाने ‘डाक सेवा’ हे अद्ययावत मोबाईल अ‍ॅप’ सार्वजनिक वापरासाठी उपलब्ध केले आहे.
या अ‍ॅपमध्ये वापरकर्त्यांसाठी अनुकूल आणि आधुनिक इंटरफेस देण्यात आला आहे. पार्सल, स्पीड पोस्ट बुकिंग, ट्रॅकिंग, पोस्टल विम्याचे हप्ते भरणे, डाक खात्याचे इंटरनेट बँकिंग, ई-पासबुक, पोस्ट ऑफिस लोकेटर, टॅरिफ कॅल्क्युलेटर, तक्रार नोंदणी अशा सर्व सेवांचा समावेश आहे. या सर्व सुविधा एका क्लिकवर सहज उपलब्ध होणार आहेत. याशिवाय पोस्टल विभागाच्या विविध योजना, उत्पादने व नियमांची सविस्तर माहितीही या अ‍ॅपमध्ये समाविष्ट करण्यात आली आहे. हे अ‍ॅप प्रमुख मोबाईल प्लॅटफॉर्मवर उपलब्ध आहे.

‘डाक सेवा अ‍ॅप’ हे डाक विभागाच्या डिजिटल परिवर्तनातील एक महत्त्वपूर्ण पाऊल आहे. नागरिकांना पारदर्शक, विश्वासार्ह आणि तत्काळ माहिती देण्याचे उद्दिष्ट या अ‍ॅपद्वारे अधिक प्रभावीपणे साध्य होईल. पोस्टल सेवा नागरिकांच्या अधिक जवळ नेण्याचा आमचा प्रयत्न या अ‍ॅपमुळे अधिक बळकट होईल.
- अभिजित बनसोडे, संचालक, टपाल सेवा, पुणे