चिंचवड, ता. २० : चापेकर चौक ते आकुर्डी मुख्य रस्त्यावर डाव्या बाजूच्या पदपथावर लावलेला ‘नो पार्किंग’चा फलक बसच्या धडकेमुळे वाकून थेट पदपथावर आडवा पडला आहे. त्यामुळे पादचाऱ्यांना चालताना अडथळा निर्माण झाला असून, ही परिस्थिती धोकादायक ठरत आहे. तिरक्या अवस्थेत पदपथाच्या मधोमध हा फलक आल्याने नागरिकांना चालता येत नाही. परिणामी अनेकांना मुख्य रस्त्यावरून चालावे लागत असून, अपघाताचा धोका वाढला आहे. विशेषतः ज्येष्ठ नागरिक, महिला आणि विद्यार्थ्यांना याचा अधिक त्रास सहन करावा लागत आहे. या समस्येकडे संबंधित विभागाने तातडीने लक्ष देऊन फलक काढून घेणे किंवा पूर्वस्थितीत सरळ करणे आवश्यक असल्याची मागणी नागरिकांकडून होत आहे.