देहू, ता. २० : देहू नगरपंचायत हद्दीत बोडकेवाडी येथील जलउपसा केंद्रात विद्युत मोटारीत तांत्रिक बिघाड झाला आहे. त्यामुळे नगर पंचायत हद्दीत शनिवारपासून (ता.१९) पाणीपुरवठा ठप्प आहे. दरम्यान, आषाढी वारी प्रवास करून संत तुकाराम महाराज पालखी सोहळा सोमवारी (ता.२१) देहूत येत आहे. त्यामुळे भाविकांसाठी पाणी उपलब्ध करण्यात अडचणी निर्माण झाल्या आहेत.
देहू नगर पंचायत हद्दीत बोडकेवाडी येथील केंद्राद्वारे उपसा करून पाणीपुरवठा केला जातो. मात्र, मागील दोन दिवसांपासून येथील यंत्रणा नादुरुस्त आहे. त्यामुळे शहराला पाणीपुरवठा झालेला नाही.
याबाबत मुख्याधिकारी चेतन कोंडे म्हणाले, ‘‘शनिवारी विद्युत मोटारीत बिघाड झाला. दुसरी विद्युत मोटर तासभर सुरू झाली. मात्र, त्यामध्येही बिघाड झाला. रविवारी दिवसभर दुरुस्ती सुरू होती. सोमवारी सकाळपर्यंत मोटार बसविण्यात येईल. तसेच पालखी सोहळा देहूत येत आहे. भाविकांना पिण्याचे पाणी उपलब्ध व्हावे, यासाठी दहा टँकर उपलब्ध करून देण्यात आले आहेत.’’