इंदोरी, ता. ९ : सांगुर्डी परिसरात मागील दोन महिन्यांपासून तरस या प्राण्याचा वावर आढळून आला आहे. त्यामुळे शेतकरी आणि नागरिकांमध्ये भीतीचे वातावरण आहे.
सांगुर्डी गावाजळील देवीआईचा ओढा व झुरीच्या ओढ्याकाठी दाट झाडे, झुडपे, जाळ्या आहेत. त्यामुळे या परिसरात तरसाचे वास्तव्य असते. सायंकाळनंतर तो अनेकांना सांगुर्डी-देहू मार्गावर दिसला आहे. त्यामुळे देहूसह चिंचवड तसेच इंदोरी, तळेगावकडे जाणाऱ्या आणि तिकडून येणाऱ्या नागरिकांना भीती वाटत आहे.
हा तरस रात्री-अपरात्री अगदी गावातही येतो. टाकाऊ अन्नपदार्थ खाताना नागरिकांनी या तरसाला पाहिले आहे, असे ग्रामस्थ मल्हारी भसे, शांताराम काळे व गणेश भसे यांनी सांगितले. दरम्यान, तरसाचा वावर असल्याबाबत खेड वनविभागास कळविले आहे, अशी माहिती वसंत भसे, उपसरपंच योगिता भसे यांनी दिली.

सांगुर्डी : देहू रस्त्यावर दिसलेला तरस.

PNE25V30013