किवळे, ता. ९ : रावेत येथील बीआरटी मार्गावर दोन्ही बाजूस असलेल्या वृक्षांच्या फुलांची मुक्त उधळण होत असल्याने नागरिकांना या भागातून जाताना परदेश वारीचा अनुभव येत आहे. किवळे येथील मुकाई चौक ते रावेत गावठाण या बीआरटी मार्गावर दोन्ही बाजूस वृक्षांच्या फुलांची उधळण होत आहे. झाडांखाली पांढऱ्या रंगाच्या फुलांचा गालिचा अंथरला असल्याचा भास होत आहे. त्यामुळे या भागातून ये-जा करताना निसर्गाकडून होणारी फुलांची उधळण नागरिकांना अनुभवायला मिळत आहे.