किवळे, ता. २६ : किवळे येथील मुकाई चौकातील हनुमान मंदिरात यंदा १३ व्या वर्षी हनुमान जन्मोत्सवानिमित्त अखंड हरिनाम सप्ताहाला गुरुवारी (ता.२६) प्रारंभ झाला. हा सप्ताह हनुमान जयंती अर्थात २ एप्रिलपर्यंत चालणार आहे.
या सप्ताहादरम्यान दररोज विविध धार्मिक कार्यक्रमांचे आयोजन करण्यात आले असून, सकाळी काकड आरती, महिला भजन, हरिपाठ, सायंकाळी कीर्तन आणि रात्री हरिजागर असे कार्यक्रम भक्तांसाठी ठेवण्यात आले आहेत.
सप्ताहात दररोज नामवंत कीर्तनकार व भजनी मंडळांचा सहभाग राहणार आहे. यामध्ये रामलिंग महाराज मोहिते, गणेश महाराज गोलांडे, रामेश्वर महाराज इंगळे, नारायण महाराज खंदारे, रामायणाचार्य अशोक महाराज हुंबे, गायनाचार्य उत्तम महाराज बडे, गाथामूर्ती तुकाराम महाराज धाडगे या कीर्तनकारांची कीर्तने होणार आहेत.
हनुमान जयंतीच्या दिवशी सकाळी ६.३० वाजता जन्मोत्सव सोहळा पार पडणार असून सकाळी १० ते १२ या वेळेत महंत बबन महाराज खेडकर (चिंचोशी, पुणे) यांचे काल्याचे कीर्तन होणार आहे. दुपारी १२ ते ३ महाप्रसादाचे आयोजन करण्यात आले आहे, अशी माहिती संयोजक विष्णू हपसे, नारायण हापसे, दत्तात्रेय हापसे, राहुल हापसे, सागर हापसे, सनील हापसे, किरण हापसे, रमेश गराडे यांनी दिली.