‘पुण्यासाठी स्वतंत्र खंडपीठ करा’

खुटबाव, ता. १६ ः पुणे शहरात मुंबई उच्च न्यायालयाचे खंडपीठ सुरु करण्याची मागणी गेल्या ४६ वर्षांपासून प्रलंबित आहे. १९७८ मध्ये महाराष्ट्र विधिमंडळात पुणे व औरंगाबाद येथे खंडपीठ सुरु करण्याचा ठराव मंजूर केला गेला. मात्र, केवळ औरंगाबादमध्येच खंडपीठ सुरु करण्यात आले. पुणे शहर अद्याप खंडपीठाच्या प्रतिक्षेत आहे. पुण्यासाठी स्वतंत्र खंडपीठ सुरू करावे, अशी मागणी राहुल कुल यांनी मुंबई येथील हिवाळी अधिवेशनात केली.
यावेळी कुल म्हणाले की, पुण्यातील वकील, नागरिक आणि विविध संघटनांकडून खंडपीठाच्या आग्रही भूमिकेसाठी वेळोवेळी आंदोलने, निवेदने आणि बैठका आयोजित करण्यात येत आहेत. भविष्यामध्ये पुणे येथे खंडपीठ सुरु झाल्यास, मुंबईला असलेल्या खटल्यांचा भार कमी होईल. तसेच पुणे, सोलापूर, सातारा, सांगली, कोल्हापूर, अहिल्यानगर, नाशिक या भागातील नागरिकांना न्याय मिळवणे अधिक सोयीचे होईल.’’