लोणावळा, ता. १९ ः खंडाळा येथे गेल्या आठवड्यात झालेला घरफोडीचा गुन्हा उघडकीस आणण्यास पोलिसांना यश आले आहे. याप्रकरणी पोलिसांनी एका आंतरराष्ट्रीय सराईत गुन्हेगारासह चौघांना ताब्यात घेतले असून, जवळपास ३० लाख रुपयांचा मुद्देमाल हस्तगत केला आहे.
याप्रकरणी वीणा नारायण मुळे (वय- ६५, रा. राजुजी कॉलनी, जुना खंडाळा रोड, लोणावळा) यांनी फिर्याद दिली होती. ९ जून रोजी त्यांच्या घरातून डोक्यात चोरट्याने घराचे कुलूप तोडत ४७ तोळे वजनाचे सोन्याचे दागिने व २ किलो ग्रॅम वजनाची चांदीची भांडी, असा जवळपास तीस लाखांचा मुद्देमाल लंपास केला होता.
पोलिसांनी तांत्रिक माहितीच्या आधारे तपास करत सराईत गुन्हेगार चंद्रकांत अनंत माने ऊर्फ चंदू (वय- ३२, चाफेकरनगर झोपडपट्टी, चिंचवड) व धनंजय हरीश काळे (वय- २०, रा. भारतनगर झोपडपट्टी, चिंचवड) या दोघांना ताब्यात घेत तपास केला असता, त्यांनी चोरी केलेले सोन्याचे दागिने व चांदीची भांडी ही दीपक शिवाजी मंदगे (वय- ३८, रा. पाटीलआळी, कर्जत, जि. रायगड) व कैलासचंद्र धगनलाल जाट (वय- ४०, रा. स्वस्तिक व्हिला, वाशी) यांच्या मदतीने विक्री केली असल्याची माहिती दिली. त्या दोघांना ताब्यात घेऊन तपासादरम्यान ३४ तोळे ८ ग्रॅम वजनाची सोन्याची लगड, २ किलो चांदीची वीट असा एकूण ३० लाख ०१ हजार रुपये किमतीचा मुद्देमाल हस्तगत केला.
यातील आरोपी चंद्रकांत माने याच्यावर कर्नाटक, चेन्नई, सोलापूर, पिंपरी चिंचवड, पुणे शहर हद्दीत सुमारे ५० हून अधिक घरफोडीचे गुन्हे दाखल आहेत. तो चेन्नई येथील घरफोडीच्या गुन्ह्यातून १५ - २० दिवसांपूर्वीच जामीनावर बाहेर आलेला आहे.
पोलिस अधीक्षक संदीप सिंह गिल, अपर पोलिस अधीक्षक रमेश चोपडे, उपविभागीय पोलिस अधिकारी अमोल मांडवे यांच्या मार्गदर्शनाखाली स्थानिक गुन्हे शाखेचे पोलिस निरीक्षक अविनाश शिळीमकर, लोणावळा शहरचे निरीक्षक राजेश रामाघरे, कर्मचारी अभिजित सावंत, राहुल लाड आदींच्या पथकाने ही कामगिरी केली.