लोणावळा, ता. ११ ः मुंबई- पुणे लोहमार्गावर बोरघाटात ठाकूरवाडी ते मंकी हिल दरम्यान रेल्वेच्या मध्य मार्गिकेवर शुक्रवारी (ता. ११) दुपारी साडेतीनच्या सुमारास मालगाडीची वाघीण (वॅगन) घसरली. यामुळे पुण्याकडे येणारी वाहतूक दोन तास विस्कळित झाली.
रेल्वेच्या सूत्रांनी दिलेल्या माहितीनुसार, बोरघाटात ठाकूरवाडी सोडल्यानंतर मंकी हिलजवळ रेल्वे किलोमीटर क्र.११८ जवळ मालगाडीची शेवटची वाघीण रुळावरून घसरली. ही घटना घडूनही गाडीचा वेग मर्यादित असल्याने मोठी हानी झाली नाही. मालगाडीचे कपलिंग तुटल्याने हा अपघात झाला असावा, अशी शक्यता सूत्रांनी व्यक्त केली.
सुदैवाने, या घटनेत कोणतीही मोठी हानी झाली नाही. याचदरम्यान पाठीमागून लगोलग येणारी चेन्नई सेंट्रल एक्स्प्रेस घाटात तातडीने थांबविण्यात आली. मुंबई-भुवनेश्वर कोणार्क एक्स्प्रेस ही बदलापूर ते अंबरनाथ दरम्यान, हैदराबाद एक्स्प्रेस ही नेरळ दरम्यान तर यशवंतपूर एक्स्प्रेस या गाड्या कर्जतदरम्यान थांबविण्यात आल्या. रेल्वे प्रशासनाने तत्काळ घटनास्थळी धाव घेत दुरुस्तीचे काम हाती घेतले. तर प्रगती एक्स्प्रेस दीड तास उशिराने निघाली. रेल्वे प्रशासनाने तातडीने उपाययोजना करत दोन तासानंतर वाहतूक सुरळीत करण्यात यश मिळवले.

फोटो ः 04461