लोणावळा, ता. १७ : लोणावळा परिसरात गोकुळाष्टमी धुमधडाक्यात साजरी झाली.
मावळ वार्ता फाउंडेशन, स्पेसलिंक केबल, विविध राजकीय पक्ष, संघटनांतर्फे दहीहंडी महोत्सव आयोजित करण्यात आला. इंदिरानगर येथील कन्हेरीआई गोविंदा पथकाने रात्री उशिरा मानाची हंडी फोडली. जयचंद चौकात संकल्प युवा प्रतिष्ठान व विनोद होगले यांच्यातर्फे आयोजित दहीहंडी गवळीवाडा येथील श्रीराम क्रीडा पथकाने फोडत बारा फूट उंचीचा करंडक व रोख बक्षीस पटकाविले. महाराष्ट्र नवनिर्माण सेनेच्या तुंगार्ली शाखेतर्फे आयोजित दहीहंडी तुंगार्लीच्या जाखमाता गोविंदा पथकाने फोडली.
अनेक ठिकाणी पुण्या-मुंबईतील गोविंदा पथकांनी उपस्थिती नोंदविली. लोणावळा शहर आणि परिसरातील तुंगार्ली, वलवन, नांगरगाव, गवळीवाडा, कुसगाव बुद्रूक येथील स्थानिक गोविंदा पथकांमध्ये मोठी चढाओढ होती.
---