मोशी, ता. १ ः भोसरीतील गुरुविहार कॉलनीतील गणेश मंदिरात अधिकमासानिमित्त वैष्णव मेळाव्याचे रविवारी (ता. ३०) आयोजन केले होते. श्री गुरुविहार मित्र मंडळ, आत्मोन्नती आणि विश्वशांती भारतीय श्रीगुरूभक्त स्वानंद प्रेमळ मंडळ, आळंदी देवाची यांच्या संयुक्त विद्यमाने हा कार्यक्रम झाला. तसेच, सद्‍गुरु सच्चिदानंद श्रीपाद बाबा (घोटी) व सद्‍गुरु सच्चिदानंद रामदास बाबा (घोटी) यांच्या पादुका आगमनानिमित्त विविध धार्मिक कार्यक्रम झाले.

यावेळी गुरुविहार महिला भजनी मंडळाचे संगीत भजन, अविनाश महाराज फडतरे यांचे प्रवचन, श्री क्षेत्र पंढरपूरच्या परत वारीचे विणेकरी रंगनाथ विठोबा बनकर यांचा स्वागत हरिपाठ झाला. तसेच सायंकाळी आठ वाजता नीलकंठ महाराज गायकवाड यांचे हरिकीर्तन झाले. कीर्तन सोहळ्यात पवन महाराज लादे, अनिल महाराज लोखंडे यांनी गायनात तर प्रवीण महाराज झामरे, शेखर महाराज लोखंडे यांनी मृदूंगावर साथ केली. कार्यक्रमाच्या यशस्वितेसाठी गुरुविहार मित्र मंडळाच्या सर्वच पदाधिकारी व कार्यकर्त्यांनी परिश्रम घेतले.