रावेत, ता. २३ : उन्हाळा सुरू होताच शहरातील बाजारपेठा टरबूज, खरबूज, आंबे आणि ताडगोळ्यांसारख्या पाणीदार फळांनी फुलून गेल्या होत्या. चौकाचौकांत फळ विक्रेत्यांनी आकर्षक मांडणी करून ग्राहकांचे लक्ष वेधले होते. मात्र, गेल्या चार दिवसांपासून सुरू असलेल्या मुसळधार पावसामुळे विक्रेत्यांच्या आशांवर पाणी फिरले आहे. पावसाचे पाणी दुकानांमध्ये शिरल्याने टरबूज, खरबूज, आंबा, जांभूळ, करवंदे आदी फळे सडू लागली असून विक्रेत्यांना ती फेकावी लागत आहेत. परिणामी, मोठ्या आर्थिक नुकसानीला सामोरे जावे लागत आहे, अशी खंत फळ विक्रेत्यांनी व्यक्त केली.
उन्हाळ्यात टरबूज १५-३० रुपये प्रतिकिलो, खरबूज ३० रुपये प्रतिकिलो, नारळ पाणीदार २५ रुपये, रत्नागिरी आणि देवगड हापूस आंबा ४०० ते ९०० रुपये प्रतिडझन, ताडगोळे, शहाळे यांना यंदा १८० रुपये प्रतिडझन या दराने शहरात विक्री होत होती, मात्र आता प्रत्येक २०- ५० रुपये तोटा सहन करून विक्री करावी लागत आहे.
यंदा उन्हाळा अधिक उष्ण जाणवेल, अशी अपेक्षा होती, मात्र अचानक बदललेल्या वातावरणामुळे आणि अचानक झालेल्या पावसामुळे ग्राहकांची फळांची मागणी घटली आहे. आंबा विक्रीला विशेषत: फटका बसत असल्याची भावना विक्रेत्यांनी व्यक्त केली आहे.
शहरात अनेक भागांतून टरबूज आणि खरबूजची आवक होत आहे. पालघर, कोकण, आंध्रप्रदेश, हैदराबाद, गुजरात, कर्नाटक येथून विविध जातींचे आंब्यांची आवक झाली होती. या फळांमध्ये भरपूर पाणी, खनिजे, लोह, फॉस्फरस व ‘ए’, ‘बी’, ‘सी’ जीवनसत्त्वे असल्याने आरोग्यास फायदेशीर मानली जातात. मात्र, हवामान बदलामुळे यंदा ही पोषकतत्त्वे ग्राहकांपर्यंत पोहोचण्याआधीच नष्ट होण्याच्या स्थितीत आहेत.

‘‘पावसामुळे टरबूज, खरबूज, आंबे, जांभूळ आणि करवंदे यांचे नुकसान होत आहे. वातावरणात अधिक ओलावा असल्यामुळे फळे सडत आहेत. परिणामी, आर्थिक नुकसान होत आहे.
- सचिन भोई, विक्रेता