रावेत, ता.२२ ः गेल्या अनेक दिवसांपासून रावेत - वाल्हेकरवाडी रस्त्यावर साचलेल्या कचऱ्याच्या ढिगाऱ्यामुळे त्रस्त झालेल्या नागरिकांना अखेर दिलासा मिळाला. स्थानिक प्रशासनाने नागरिकांकडून सातत्याने येणाऱ्या तक्रारींची दखल घेऊन या रस्त्यावरील कचरा पूर्णपणे उचलला. त्यामुळे परिसरातील दुर्गंधी कमी झाली असून आरोग्यविषयक समस्यांचा धोकाही काही प्रमाणात टळला आहे.
गेल्या काही आठवड्यांपासून या रस्त्यावर मोठ्या प्रमाणावर कचरा साचला होता. त्याने स्थानिकांना वाहतूक आणि येण्या-जाण्यासाठी अडचणी येत होत्या. तसेच या कचऱ्यामुळे डास आणि इतर किटकांचा प्रादुर्भाव वाढला होता. त्यामुळे साथीचे रोग पसरण्याची भीती होती. स्थानिक नागरिकांनी दिलेल्या माहितीनुसार, महानगरपालिकेच्या आरोग्य विभागाने तातडीने कार्यवाही केली असून यापुढे अशा प्रकारे कचरा साचणार नाही याची खबरदारी घेतली जाईल, असे आश्वासन दिले आहे. नागरिकांनी आरोग्य विभागाच्या या त्वरित कार्यवाहीचे कौतुक केले आहे.