निगडी, ता. १२ ः पिंपरी चिंचवड महानगरपालिकेच्यावतीने आकुर्डीतील शितळादेवी मंदिर ते खंडोबा मंदिर परिसरात विशेष स्वच्छता मोहीम राबविण्यात आली. या उपक्रमाला स्थानिक नागरिक, महिला बचतगट, शाळकरी मुले आणि महापालिकेचे अधिकारी आणि कर्मचाऱ्यांनी मोठ्या प्रमाणात सहभाग नोंदवत स्वच्छतेबाबत जनजागृती घडवून आणली.
महानगरपालिकेचा आरोग्य विभाग, घनकचरा व्यवस्थापन विभाग आणि ‘अ’ क्षेत्रीय कार्यालय यांच्या संयुक्त विद्यमाने या मोहिमेचे आयोजन करण्यात आले. सकाळी आठ वाजता मोहिमेची सुरुवात झाली. परिसरातील मुख्य रस्ते, गल्लीबोळ, सार्वजनिक ठिकाणे, मंदिर, बाजारपेठ या सर्व भागांत सफाई कामगारांनी व स्वयंसेवकांनी कचरा उचलणे, भिंतीवर लावलेले फलक काढणे, सार्वजनिक स्वच्छतागृहांची सफाई, झाडांचा पालापाचोळा उचलणे यासारखी कामे केली.
या मोहिमेत विशेषतः महिला मंडळे, तरुण मंडळे आणि स्थानिक रहिवाशांनी मोठ्या संख्येने भाग घेतला. काही शाळांनी विद्यार्थ्यांच्या माध्यमातून जनजागृती फेरी काढून ‘स्वच्छ गाव, सुंदर गाव’ अशा घोषणा दिल्या. मोहिमेदरम्यान अनेकांनी आपल्या परिसरातील स्वच्छता ही सामूहिक जबाबदारी असल्याचे सांगितले.

आकुर्डीतील शितळादेवी मंदिर, तुळजाभवानी मंदिर आणि खंडोबा मंदिर परिसरातील स्वच्छता सुधारण्याच्या उद्देशाने ही मोहीम हाती घेण्यात आली. नागरिकांच्या चांगल्या प्रतिसादामुळे यशस्वी अंमलबजावणी शक्य झाली. महापालिकेचे आरोग्य कर्मचारी रोज नित्याने स्वच्छता करत असतात. आपला परिसर स्वच्छ ठेवण्याची प्रत्येक नागरिकांची जबाबदारी आहे. सगळ्यांनी मिळून आपला परिसर स्वच्छ ठेवू या.
- विकास शिंदे, आरोग्य निरीक्षक, ‘अ’ क्षेत्रीय कार्यालय

महापालिकेने छान उपक्रम राबवला आहे. आम्ही नेहमी परिसर स्वच्छ ठेवण्यासाठी सजग असतो; पण आज सर्वांनी मिळून काम केल्याने फार आनंद झाला.
- मनीषा शिंदे, स्थानिक रहिवासी

‘‘फक्त आजच नाही; तर रोजच आपण आपल्या परिसराची स्वच्छता राखली पाहिजे. हे अभियान नियमित राबविले जाते. प्रभागातील संपूर्ण परिसर स्वच्छ ठेवण्याची आमची जबाबदारी आम्ही पार पाडत आहोत.
- ओम प्रकाश सावदा, आरोग्य मुकादम

NGI25B00632