रावेत, ता. १८ : अखिल भारतीय ब्राह्मण महासंघ पिंपरी-चिंचवडच्यावतीने दहावी आणि बारावीच्या यशस्वी विद्यार्थ्यांचा सत्कार समारंभ पार पडला. यावेळी २५० विद्यार्थ्यांना शैक्षणिक साहित्य प्रशस्तीपत्र देण्यात आले. तसेच, गरजू विद्यार्थ्यांना शिष्यवृत्तीचे वाटपही करण्यात आले.
कार्यक्रमाचे प्रास्ताविक महासंघाचे प्रदेश सरचिटणीस दिलीप कुलकर्णी यांनी केले. ज्येष्ठ लेखक व व्याख्याते विवेक वेलणकर आणि महासंघाचे राष्ट्रीय अध्यक्ष डॉ. गोविंद कुलकर्णी, युवा उद्योजक अश्विन इनामदार यांनी विद्यार्थ्यांना मार्गदर्शन करून पुढील वाटचालीस शुभेच्छा दिल्या. याच कार्यक्रमात अश्विन इनामदार यांना महासंघाच्या पिंपरी-चिंचवड शहर उद्योजक आघाडी युवा अध्यक्षपदाचे नियुक्तीपत्र देण्यात आले. यावेळी महासंघाचे पिंपरी-चिंचवड शहराचे अध्यक्ष सचिन कुलकर्णी, आर.एस. कुमार, सुरेश भोईर उपस्थित होते. कार्यक्रमाचे सूत्रसंचालन अनुपमा कुलकर्णी यांनी केले; तर आभार ब्रह्मोद्योगचे प्रदेश उपाध्यक्ष राजन बुडूख यांनी मानले.