आकुर्डी, ता. २४ : आकुर्डी रस्त्यावरील डॉ. डी. वाय. पाटील महाविद्यालय येथील एका चहा स्टॉलच्या जवळील पदपथावरील उघडा डीपी सध्या परिसरातील नागरिकांसाठी धोकादायक ठरू शकतो. एखादा अपघात झाल्यास त्याला जबाबदार कोण ? असा सवाल नागरिकांनी केला आहे.
या परिसरात अनेक चहा स्टॉल्स, झेरॉक्स सेंटर, स्ट्रीट फूड गाळे, स्टेशनरी दुकाने आणि अन्य छोटे व्यवसाय आहेत. त्यामुळे पदपथावर ग्राहकांची सतत गर्दी असते. अशात उघड्या डीपीने विजेचा झटका बसण्याचा धोका निर्माण झाला आहे.
आम्ही रोज इथे चहा, अल्पोपहर आणि कागदपत्रांची झेरॉक्स करण्यासाठी येत असतो. मात्र, उघड्या डीपीमुळे भीती वाटते, अशी भावना विद्यार्थी अरुण भिसे याने व्यक्त केली.
दरम्यान, या डीपीला त्वरित झाकण बसविले जाईल, असे महावितरणच्या चिंचवड उपविभागाचे अतिरिक्त कार्यकारी अभियंता दिवाकर देशमुख यांनी स्पष्ट केले.
NGI25B00672