सकाळ इफेक्ट
रावेत, ता. २५ : शाहूनगर आकुर्डी एमआयडीसी परिसरात मोठ्या प्रमाणावर खड्डे पडले आहेत. या समस्येची नागरिकांनी वारंवार तक्रार केल्यानंतर अखेर पिंपरी-चिंचवड महापालिकेच्या ‘अ’ प्रभाग कार्यालयाच्या स्थापत्य विभागाने खड्डे बुजविण्याचे काम हाती घेतले आहे.
पालिकेच्या वतीने विशेष पथक तयार करण्यात आले आहे. या कामासाठी तंत्रज्ञ, कामगार आणि वाहने सज्ज ठेवण्यात आली असून, आवश्यक त्या ठिकाणी लगेच खडी व डांबरीकरणाचे काम करण्यात येत आहे. महापालिकेच्या स्थापत्य विभागाने ‘खड्डे दुरुस्ती पथक’ नावाने ही मोहीम राबवत आहे. नागरिकांनीही या मोहिमेचे स्वागत केले असून, कामाची गती आणि गुणवत्ता टिकून राहावी, अशी अपेक्षा नागरिकांकडून व्यक्त केली जात आहे.

स्थानिक नागरिक गणेश जाधव म्हणाले, ‘‘गेल्या आठवड्यात खड्ड्यांमुळे अनेक वाहनचालकांचे अपघात होत होते. महापालिकेकडे तक्रार केली याची दखल घेत आता काम सुरू झाले आहे, ही चांगली गोष्ट आहे.’’

तर, स्थानिक नागरिक संध्या पाटील म्हणाल्या, ‘‘पावसात या रस्त्यांवरून चालणेही कठीण झाले होते. आता हे काम दर्जेदार व्हावे आणि टिकाऊ व्हावे, ही आमची मागणी आहे.’’

आकुर्डी एमआयडीसी परिसरात खड्ड्यांमुळे वाहनचालक आणि पादचाऱ्यांना त्रास होत होता. नागरिकांच्या तक्रारींचा तत्काळ विचार करून हे काम हाती घेतले आहे. येत्या काही दिवसांत परिसरातील सर्व खड्डे बुजवले जातील.
- विजय कांबळे, स्थापत्य कार्यकारी अभियंता

शाहूनगर आकुर्डी : एमआयडीसी परिसरात खड्डे बुजविण्याचे काम करताना कर्मचारी.