निगडी ः ऐन उन्हाळ्यात कमी दाबाने, अनियमित वेळेत पाणीपुरवठा होत असल्यामुळे हाल होत आहे. त्यामुळे वेळा निश्चित करुन योग्य दाबाने पाणीपुरवठा करावा अशा मागण्या नागरिकांनी केल्या.
महापालिकेच्या ‘फ’ क्षेत्रीय कार्यालयात आयोजित बैठकीमध्ये नागरिकांनी वरील मागण्या केल्या. यावेळी नगरसेवक संगीता ताम्हाणे, यश साने, नीलेश नेवाळे, उत्तम केंदळे, शिवानी नरळे यांच्यासह रुपीनगर, तळवडे, निगडी आदी भागांतील नागरिक उपस्थित होते.
शुद्ध व योग्य दाबाने पाणीपुरवठा करा. पाणीपुरवठ्याची नियमित वेळ निश्चित करा. सामान्य नागरिकांनी फोन केल्यानंतर अधिकारी प्रतिसाद देत नाहीत. त्यांच्यावर त्वरीत कारवाई करावी, अशा मागण्या नगरसेवक आणि नागरिकांनी यावेळी केल्या.

टँकरचा भुर्दंड नागरिकांना नको. त्यासाठी त्वरीत योग्य त्या उपाययोजना कराव्यात.
- संजीवन सांगळे, अध्यक्ष, सोसायटी फेडरेशन

यमुनानगर भागामध्ये अनियमित पाणी पुरवठा होत आहे. त्यामुळे ऐन उन्हाळ्यामध्ये नागरिकांचे मोठे हाल होत आहेत. तरी त्वरीत पाणीपुरवठा सुधारावा.
- शुभांगी काळवीट, नागरिक

या भागात झपाट्याने लोकवस्ती वाढत आहे. परंतु मागील चार वर्षा एवढाच पाणीपुरवठा आहे. त्यामुळे तात्पुरत्या उपाय योजना करून काही दिलासा देण्यासाठी प्रयत्न आहे. कायमस्वरूपी ही समस्या सोडविण्यासाठी भामा आसखेड योजनेचे पाणी एक वर्षभरामध्ये पोहोचविण्याचे नियोजन आहे.
- विजयसिंह भोसले, कार्यकारी अभियंता, पाणीपुरवठा विभाग, ‘फ’ क्षेत्रीय कार्यालय