जुनी सांगवी, ता.१८ ः पिंपळे निलखमधील रक्षक चौक ते गावठाण, विशालनगर आणि अंतर्गत रस्ते खड्डेमय झाल्याने नागरिकांना रहदारीस कसरत करावी लागत आहे. सध्या पावसाळ्याचे दिवस असल्याने हे खड्डे रहदारीसाठी धोकादायक ठरत आहेत. त्याने अपघातांचे प्रमाण वाढले आहे.
पिंपळे निलखचा मुख्य आणि अंतर्गत रस्त्यांची सध्या चाळण झाली आहे. मुख्य रस्त्यावर मोठी रहदारी असते. प्रमुख बाजारपेठ, शाळा, पेट्रोल पंप, मोठ्या रहिवासी सोसायट्यांचा हा परिसर असल्याने वाहने व नागरिकांची या रस्त्यावर वर्दळ असते. काही ठिकाणी स्थापत्य विभागाकडून खड्डे दुरुस्ती करण्यात आली आहे. मात्र, अनेक ठिकाणी दुरुस्ती करण्यात आली नसल्याने नागरिकांना रहदारीसाठी धोकादायक प्रवास करावा लागत आहे.
नागरिक दीपक खुडे म्हणाले,‘‘खड्डे दुरुस्तीची कामे तातडीने करण्यात यावीत. मुख्य रस्ता असल्याने विद्यार्थी प्रवासी वाहतूक ही या रस्त्यावर मोठी असते.’’

सध्या काही ठिकाणी कामे करण्यात आली आहेत; तर काही ठिकाणी दुरुस्ती कामे सुरू आहेत. विशाल नगर डीपी रस्ता व पिंपळे निलख अंतर्गत रस्त्यावरील खड्डे तत्काळ बुजविण्यात येतील.
- अविनाश चव्हाण, अभियंता, स्थापत्य विभाग