पिंपरी ः तळवडे ते निगडी अरुंद रस्ता असल्याने मार्गावर प्रचंड वाहतूक कोंडी होत आहे. त्याचा थेट परिणाम देहू-आळंदी रस्त्यावर तळवडे चौकावर होऊन तो ‘ब्लॉक’ होतो. त्यामुळे देहू, तळवडे आयटी पार्क व म्हाळुंगे एमआयडीसी आणि चिखली, निगडीकडून येणाऱ्या वाहनांच्या लांबच लांब रांगा लागतात. वाहतूकही ठप्प होते. वाहनचालक नियमांचे पालन करत नसल्याने आणि बहुतांश वेळा सिग्नल बंद असल्याने कोंडीत भर पडत आहे. वाहतूक कोंडीत तासनतास अडकून पडत असल्याने विद्यार्थी, कामगार आणि उद्योजक त्रस्त झाले आहेत.

कोंडीची कारणे
- वाहनचालक उलट्या दिशेने वाहने घेऊन जातात
- ट्रेलर, कंटेनर वळविताना वेळ लागत असल्याने सिंग्नलची वेळ निघून जाते
- सिग्नल न पाळता वाहने दामटणे
- अरुंद रस्ता व खड्ड्यांची भर

उपाययोजना काय
- निगडी-तळवडे रस्ता रुंदीकरण
- सिग्नल यंत्रणेतील टायमिंग वाढवणे
- देहू- आळंदी मार्गांवरील खड्डे बुजविणे
- चौकातील रिक्षा स्टँड हलवणे

मी रावेतवरून कामासाठी चाकण एमआयडीसीत जातो. दररोज सकाळी नऊ ते अकरा आणि सायंकाळी सहा ते नऊ या कालावधीत त्रिवेणी चौक ते कॅनबे चौकापर्यंत प्रचंड वाहतूक कोंडी असते. बऱ्याच वेळा दोन ते तीन तास लागतो, हे अंतर पार करण्यासाठी लागतो. यावर कायमस्वरूपी उपाययोजना केल्या पाहिजेत.
- मनोज चव्हाण, वाहनचालक