जुनी सांगवी, ता.९ ः पिंपरी चिंचवड महानगरपालिकेच्या ‘ह’ क्षेत्रीय कार्यालयामार्फत जुनी सांगवी प्रभाग क्रमांक ३२ अंतर्गत स्वच्छता सप्ताह मोहिमेअंतर्गत रस्ते, चौक, सोसायटी परिसरात आरोग्य विभागाकडून स्वच्छता मोहीम राबविण्यात आली. सध्या पावसाळ्याचे दिवस असल्याने साचून राहिलेले पाणी, कचरा, अडगळीची ठिकाणे, परिसर स्वच्छ ठेवण्याबाबत आवाहन करण्यात आले.
वसंतदादा पाटील पुतळा, बसस्थानक परिसर स्वच्छ करून अभियानास सुरूवात करण्यात आली. स्वच्छ महाराष्ट्र अभियान अंतर्गत बस व रिक्षा थांबे स्वच्छ करण्यात आले. सार्वजनिक ठिकाणी लावलेले जाहिरात फलक, ज्येष्ठ नागरिक ‘दादांचे कट्टे’, स्मशानभूमी परिसर, मोटार गॅरेज यांची तपासणी करून स्वच्छतेबाबत सूचना देण्यात आल्या. पाण्याच्या टाक्या, उपकरणे, सोसायटी परिसरातील अडगळीतील ठिकाणे, मोकळे भूखंड यांची पाहणी करून स्वच्छता करण्यात आली. या उपक्रमात ५० ते ६० आरोग्य कर्मचारी, अधिकारी यांनी सहभाग घेतला.
महापालिकेच्या ‘ह’ क्षेत्रिय अधिकारी पुजा दुधनाळे यांच्या मार्गदर्शनाखाली ब्रँड अँबेसिडर आदिती निकम, सहाय्क आरोग्य अधिकारी अंकुश झिटे, मुख्य आरोग्य निरीक्षक दीपक कोटीयाना, आरोग्य निरीक्षक संदीप राठोड, नारायण शितोळे, वैशाली रणपिसे आदींचा समावेश होता.

पथनाट्याद्वारे जनजागृती
या मोहिमेंतर्गत झाडांचा पालापाचोळा, वाढलेले गवत, प्लास्टिक कचरा, कागद, पुठ्ठा व इतर कचरा संकलन करून संपूर्ण परिसर स्वच्छ करण्यात आला. पथनाट्याच्या माध्यमातून डेंगी आजारासंदर्भात माहिती देण्यात आली. ‘स्वच्छता पाळा डेंगी टाळा’, ‘पिण्याचे पाणी उकळून गाळून घ्या’, ‘परिसर व घरातील उपकरणे स्वच्छ ठेवा’, असे आवाहन पथनाट्याद्वारे करण्यात आले.

सध्या पावसाळ्याचे दिवस असल्याने साथीचे आजार होऊ नयेत यासाठी नियमित स्वच्छता मोहिमेत अंतर्गत स्वच्छता सप्ताह राबविण्यात आला. या काळात अडगळीची ठिकाणे, पाण्याच्या टाक्या, पिंपे इत्यादींच्या स्वच्छतेबाबत जनजागृती करण्यात आली.
- पूजा दुधनाळे, ‘ह’ क्षेत्रिय अधिकारी

PIM25B20091