पिंपरी, ता. २८ ः पिंपळे सौदागर येथील ज्येष्ठ साहित्यिक प्रा. डॉ. बाळासाहेब लबडे यांच्या ‘शेवटची लाओग्राफिया’ या कादंबरीचा चा इंग्रजी अनुवाद प्रसिद्ध झाला. ‘द लास्ट फोकटेल’ असे इंग्रजीतील अनुवादित आवृत्तीचे नाव आहे. ज्येष्ठ अनुवादक डॉ. विलास साळुंखे यांनी हा अनुवाद केला आहे. ही आवृत्ती ऑथर्स प्रेस या आंतरराष्ट्रीय प्रकाशन संस्थेकडून दिल्लीत नुकतीच प्रकाशित करण्यात आली.
मुळ कादंबरी २०२२ मध्ये अथर्व पब्लिकेशनने प्रसिद्ध केली होती. या कादंबरीची मराठीतील अनेक ज्येष्ठ समीक्षकांनी प्रशंसा केली. या कादंबरीला अनेक राज्यस्तरीय पुरस्कारही प्राप्त झाले आहेत. ही बहुचर्चित कादंबरी इंग्रजी वाचकांसाठी खुली झाल्यामुळे मराठी साहित्यातील समृद्ध परंपरेचे दर्शन आंतरराष्ट्रीय स्तरावर झाले आहे.
उत्तराधुनिक शैली, मनोविश्लेषण, लोक-सांस्कृतिक दृष्टिकोन यामुळे ‘द लास्ट फोकटेल’ ही आगळी साहित्यकृती ठरते. प्रा. डॉ. लबडे यांची यापूर्वी सतरा पुस्तके प्रकाशित झाली आहेत. त्यांना अनेक प्रतिष्ठेचे पुरस्कार आणि मानसन्मान प्राप्त झाले आहेत.
-----