पिंपरी, ता. २२ ः पाणीपुरवठा विभागांतर्गत देखभाल- दुरुस्तीची कामे करणाऱ्या ठेकेदाराकडून एक लाख रुपयांची लाच घेताना महापालिकेच्या पाणीपुरवठा विभागातील लिपिकास अटक केली आहे. महापालिकेच्या इतिहासातील ही आतापर्यंतची ३३ वी कारवाई आहे.
महापालिकेतील पाणीपुरवठा विभागात लाचलुचपत प्रतिबंधक विभागाने मंगळवारी दुपारी कारवाई केली होती. त्यात दिलीप भावशिंग आडे (वय ५१) याला ठेकेदाराकडून लाच घेताना ताब्यात घेतले होते. त्याच्याविरुद्ध रात्री उशिरा गुन्हा दाखल करून अटक केली. निविदेनुसार काम मिळालेले असतानाही कामाच्या वर्क ऑर्डरची फाइल तयार करण्यासाठी एक लाख पाच हजार रुपयांची लाच मागितल्याची आणि तडजोडीअंती एक लाख रुपये घेतल्याचा आरोप आडेवर आहे.

पहिली घटना १९९७ मध्ये
महापालिकेत लाच प्रकरणी छापा पडल्याची पहिली घटना १९९७ मध्ये घडली. त्या वेळी चिंचवडच्या प्रेमलोक पार्क येथे सदनिकेची नोंदणी करण्यासाठी ३०० रुपयांची लाच घेताना तत्कालीन आयुक्तांच्या स्वीय सहाय्यकाला अटक झाली होती. आतापर्यंत लाचेच्या ३३ घटना घडल्या आहेत.

तीन वर्षात तीन घटना
महापालिकेत २०२१ मध्ये स्थायी समिती अध्यक्षांसह त्यांच्या कार्यालयातील चार कर्मचाऱ्यांना अटक झाली होती. ती तक्रार एका ठेकेदाराने केली होती. गेल्या वर्षी नगररचना विभागातील सर्व्हेअरला लाच प्रकरणी अटक केली होती. आता पाणीपुरवठा विभागात कारवाई झाली.

पाणी पुरवठा विभागात एसीबीची झालेली कारवाई चांगली आहे. लाचखोरीची प्रकरणे होऊ नयेत. मात्र, अशा कारवायांमुळे पारदर्शक कारभार होण्यास मदत होते. लाच मागणाऱ्यांची तक्रार नागरिकांनी करायला हवी. एकाच ठिकाणी अनेक वर्ष काम करणाऱ्या अधिकारी, कर्मचाऱ्यांच्या पुढील महिन्यात बदल्या केल्या जातील
- शेखर सिंह, प्रशासक, महापालिका
---