सोमाटणे, ता. ६ ः कासारसाई धरणाजवळ गावठी दारूभट्टीवर शिरगाव पोलिसांनी टाकलेल्या छाप्यात एक लाख ६२ हजार रुपयांची दारू व रसायन नष्ट करण्यात आले.
शिरगाव पोलिसांनी दिलेल्या माहितीनुसार कासारसाई धरण परिसरात गावठी दारू तयार केली जात असल्याची माहिती पोलिसांना समजली. या माहितीच्या आधारे दारुभट्टीच्या जागेचा शोध घेतला असता तेथे दोन हजार लिटर दारू तयार करण्याचे कच्चे रसायन व साहित्य आढळून आले. पोलिसांनी सापळा रचून या प्रकरणातील दोन महिला आरोपींना ताब्यात घेतले असून त्यांच्याविरुद्ध गुन्हा दाखल केला आहे. दरम्यान, गेल्या एक वर्षापासून स्थानिक पोलिसांनी पवनमावळातील गावठी दारुभट्ट्यांवर अनेक वेळा छापे टाकून नष्ट करण्याचे सत्र सुरू ठेवले असतानाही हा व्यवसाय पवनमावळातून हद्दपार होऊ शकला नाही. पवना कासारसाई नदीकाठ, द्रुतगती मार्ग परिसर व सह्याद्रीच्या डोंगरदऱ्यातील भाग हा गावठी दारुभट्ट्यांसाठी सुरक्षित असल्याने आरोपी सतत पोलिसांना चकवा देत दारू भट्ट्यांचे ठिकाण बदलतात, त्यामुळे छापे टाकूनही हा व्यवसाय अद्याप सुरूच आहे.