पिंपरी, ता. २९ ः वाढते शहरीकरण, पायाभूत सुविधा, पाणी वापर व पुरवठा याबाबत धोरणे बनविण्यात येत आहे. त्यासाठी जागतिक जल दिनानिमित्त महापालिका, सीपीसी ॲनालिटिक्स आणि पुणे नॉलेज क्लस्टर (पीकेसी) यांच्यात पाणी आणि शाश्वतता उपक्रमांवर सहकार्य करण्यासाठी सामंजस्य करार झाला. पाणीपुरवठा, वापर, जलप्रक्रिया, पाणलोट क्षेत्र आणि नैसर्गिक संसाधने आदी बाबींवर काम केले जाणार आहे. महापालिका प्रशासक शेखर सिंग म्हणाले, ‘‘महापालिका सर्व नागरिकांसाठी पाण्याची सुरक्षा निश्चित करण्यासाठी सातत्याने काम करत आहे. या करारामुळे राबविण्यात येणाऱ्या प्रकल्पामुळे शहराची पाण्याची मागणी आणि पुरवठा समजून घेण्यात आणि नियोजन करण्यात मदत होईल.’’
पुणे नॉलेज क्लस्टरच्या प्रकल्प प्रमुख डॉ. अश्विनी केसकर म्हणाल्या, ‘‘पुणे महानगर प्रदेशासाठी शाश्वत जल कृती आराखडा विकसित करण्याच्या दिशेने हा उपक्रम महत्त्वपूर्ण पाऊल आहे. महापालिकेसह जिल्ह्यातील इतर सरकारी संस्थांमध्ये समान अभ्यास करण्यास मदत करेल.’’ सीपीसीचे ओंकार साठे उपस्थित होते.
---